Консульства Польшчы ў Гародні пачало прымаць анкеты на візы толькі з даведкай з месца працы
12- 1.12.2015, 19:36
- 32,105
Дагэтуль толькі ў Гародні не патрабавалася даведка аб заробку, даходах або даведка з банка аб наяўнасці сродкаў на рахунку.
З панядзелка, 30 лістапада, Генеральнае консульства Польшчы ў Гародні змяніла патрабаванні да дакументаў, якія падаюцца заяўнікамі на атрыманне візы, паведамляе «Блог Гродна».
Галоўнае змяненне ў падаванні гарантый фінансавай заможнасці заяўніка. Амаль ва ўсіх тыпах віз патрабуецца дадаць да ранейшага пакету дакументаў адзін з пералічаных ніжэй, якія пацвярджаюць наяўнасць грашовых сродкаў падчас знаходжання ў Польшчы:
- Сапраўдная, выдадзеная банкам даведка аб стане рахунку;
- Сапраўдная крэдытная карта;
- Сапраўдная даведка з месца працы аб даходах за апошнія 3 месяцы.
Як пракаментаваў змены дырэктар турагенцтва «Калумбустур» Віталь Мацута, змены сапраўды пачалі дзейнічаць з гэтага панядзелка і былі для дзясяткаў гарадзенцаў непрыемным сюрпрызам. Паводле ягоных слоў, новаўвядзенне звязанае з уніфікацыяй працы ўсіх консульскіх аддзелаў Рэспублікі Польшча на тэрыторыі Беларусі.
Дагэтуль толькі ў Гародні не патрабавалася даведка аб заробку, даходах або даведка з банка аб наяўнасці сродкаў на рахунку, у Берасці і Менску гэтыя дакументы запытваліся ўжо даўно. Як адзначыў Віталь Мацута, звычайна на рахунку павінна быць сума, эквівалентная 200-300 еўрам, гэтага дастаткова для станоўчай пастановы аб адкрыцці візы.
Для пенсіянераў патрабуецца копія пенсійнага пасведчання і выпіска пра налічэнні пенсіі за апошнія тры месяцы. Для дзяцей і школьнікаў спатрэбіцца гарантыйны ліст ад бацькоў з падачай усялякага з вышэйпералічаных дакументаў.
Акрамя таго, з новага года гарадзенцаў чакаюць і іншыя змены. Консульскі збор будуць плаціць дзеці старэйшыя за 12 гадоў і студэнты дзённых аддзяленняў ВНУ да 21 года, якія дагэтуль маглі разлічваць на атрыманне бясплатных віз.