Леў Марголін: Не дасць МВФ, возьмуць грошы ў народа

Гэтыя 3 мільярды даляраў улада збярэ з народа.

«Калі ў МВФ нас не падтрымаюць і не зразумеюць, у гэтым няма трагедыі. Мы будзем далей з імі працаваць ці не працаваць наогул», - заявіў Аляксандр Лукашэнка на нарадзе аб ходзе перамоў па праграме пашыранага фінансавання з МВФ, якое прайшло 1 снежня.

«Як ні дзіўна, гэта сапраўды не смяротна, - згаджаецца эканаміст Леў Марголін. - Наша дзяржава ўжо даўно навучылася выходзіць з такога становішча».

Пра гэта Леў Марголін паведаміў у інтэрв'ю сайту ucpb.org:

«Як ні дзіўна, але сапраўды, калі мы не атрымаем крэдыт Міжнароднага валютнага фонду, то гэта не смяротна. Таму што гэтыя 3 мільярды могуць дапамагчы разлічыцца з тэрміновымі абавязкамі на будучы год, у нейкай ступені яны могуць палегчыць сітуацыю з бюджэтнікамі, з пенсіянерамі. Але яны абсалютна нічым не дапамогуць ні трактарнаму заводу, ні аўтамабільнаму заводу, ні іншым прадпрыемствам, якія назапашваюць сваю прадукцыю на складах.

Калі крэдыту не будзе, вядома, сітуацыя будзе трохі больш складанай, але наша дзяржава ўжо даўно навучылася выходзіць з гэтага становішча. Будзе інфляцыя не 10% гадавая, а 15%. І гэтыя 3 мільярды ўлада збярэ з народа. Проста мы станем трошкі бяднейшымі. Але нам да гэтага не прывыкаць».