Кіраўніца МЗС Эстоніі: У інтарэсах NATO падтрымліваць Украіну

Падтрымка еўраатлантычнай інтэграцыі Украіны з боку Эстоніі і NATO застаецца аднадушнай, заявіла кіраўніца МЗС Эстоніі Марына Кальюранд.

Пра гэта паведамляе выданне Postimees.

Саюзнікі заявілі аб падтрымцы Украіны і асудзілі агрэсію Расеі, якая падрывае бяспеку ў Еўропе. Са словаў Кальюранд, падтрымка еўраатлантычнай інтэграцыі Украіны з боку Эстоніі і NATO застаецца аднадушнай.

"Мы высока цэнім правядзенне ва Украіне маштабных рэформаў, якія з'яўляюцца важным крокам у збліжэнні дачыненняў з NATO і ЕЗ", - дадала яна.

Кіраўнікі МЗС NATO таксама абмеркавалі стасункі з Расеяй, якія замарожаныя пасля ўварвання Расеі ва Украіну і анэксіі Крымскага паўвострава. У якасці канала стасункаў адкрытыя толькі палітычныя кантакты на вышэйшым узроўні.

"У фокусе дыскусій знаходзіліся варыянты ўмацавання пазіцыі стрымлівання NATO ў дачыненні да Расеі. Ад саміту NATO ў Варшаве мы чакаем моцных практычных крокаў, якія ўмацуюць стрымліванне з боку альянсу", - сказала Кальюранд і дадала, што важней за ўсё захоўваць у стасунках з Расеяй адзінства і салідарнасць альянсу.