Расейскія пастаўшчыкі пастаўляюць дызельнае паліва ва Украіну праз беларускія кампаніі

Беларускія пастаўшчыкі пасля паўгода ўпартай барацьбы за ўкраінскі рынак дызпаліва выціснулі з яго расейцаў.

Прычым, скарысталіся іх жа «зброяй», афармляючы на сябе расейскае паліва, якое не можа туды ўвозіцца з «палітычных матываў», піша «Ежедневник».

Аналізуючы ход падзей у рэгіёне ў 2014-2015 гадах, можна канстатаваць, што спроба Крамля вярнуць сабе сусветнай геапалітычны статус, ператвараецца ў стабільную і, відавочна, доўгатэрміновую крыніцу дадатковых эканамічных даходаў яе хаўрусніка.

Дакладней сказаць - у некалькі крыніц.

Па-першае, гэта плата за лаяльнасць ва ўмовах, калі колькасць хаўруснікаў Расеі зведзеная да мінімуму. Аб'ёмы аплат сур'ёзныя - ад амаль ўнутрырасейскага кошту газу і дазволу пакідаць нафтавыя экспартныя мыты ў сваім бюджэце да стабілізацыйных крэдытаў ЕАЭС і карпаратыўных уліванняў дзярждочкам ў Беларусі.

Па-другое, гэта харчовыя контрсакцыі Расеі супраць ЕЗ, ЗША і г.д., якія дапамаглі росту дзейных беларускіх бізнэсаў і спрыяюць назапашванню першапачатковага капіталу бізнэсам пачаткоўцам. Думаецца, што расейска-турэцкі канфлікт створыць новы вектар, які зацікаўленыя бакі несумненна паспрабуюць выкарыстаць у сваіх інтарэсах.

Нарэшце, трэцяя крыніца з'явіўся ў выніку абвастрэння з 2014 года расейска-ўкраінскіх дачыненняў. Беларусь ужо атрымала некалькі пераваг, але самая значная - гэта паліўная сфера.

У першай палове 2015 года, аднак, сітуацыя выглядала не вельмі аптымістычнай. Даходы беларускіх пастаўшчыкоў упалі з прычыны падзення агульнасусветных коштаў нафтапрадуктаў, скараціліся і аб'ёмы. Напрыклад, калі ў студзені 2015 пастаўкі былі супастаўныя з аналагічным перыядам мінулага года (114 тысяч тон супраць 130 тысяч тон), то ў чэрвені яны прыкметна скараціліся (151 тысяча тон супраць 217 тысяч тон). Адначасова пасля некаторага перапынення актывізаваліся расейскія кампаніі. У ліпені Расея паставіла ва Украіну 182 тысячы тон і ўпершыню з лістапада 2013 перагнала Беларусь (аб'ём паставак - 167 тысяч тон). Дзель беларускага дызпаліва скарацілася за год з 60% да 44%.

Але зноў беларусам дапамог... Крэмль. З пачатку кастрычніка пастаўкі расейскага дызпаліва ва Украіну пайшлі на змяншэнне праз эмбарга, уведзенага Федэральнай службай тэхнічнага і экспартнага кантролю Расеі. Гэтая служба цяпер выдае дазволы на ўвоз на тэрыторыю Украіны толькі ў тым выпадку, калі ўкраінскія контрагенты пададуць расейскім экспарцёрам даведкі, што дызпаліва, аліва, бутан ды іншае не будуць выкарыстоўвацца ў вайсковых мэтах.

У выніку, калі пастаўкі дызпаліва з Беларусі на працягу 2015 у сярэднім складалі блізу 150 тысяч тон, то ў лістападзе ва Украіну было адгружана 272 тысячы тон. Імпарт паліва з Літвы склаў 92 тысячы тон, Польшчы - 24 тысячы тон, а з Расеі ўсяго 19 тысяч тон.

Гэткі значны рост аб'ёмаў паставак дызпаліва з Беларусі ўдзельнікі рынка тлумачаць, у тым ліку, новай схемай, на якую ва ўмовах эмбарга пайшлі пастаўшчыкі з Расеі. Пасля ўвядзення забароны на вырабленае на расейскіх НПЗ паліва яго пачалі сертыфікаваць ў Беларусі як ПДЭ (паліва дызельнае экспартнае) і адгружацца ва Украіну яно як беларускі прадукт праз беларускія кампаніі. У ліку пасярэднікаў называюцца «Інтэрсэрвіс» (уладальнікі Аляксандр Шакуцін і Мікалай Варабей) і «Энэрга-ойл» (Аляксей Алексін).

Адзначым, што Беларусь застаецца лідарам у пастаўках ва Украіну імпартнага бензіну. У лістападзе з беларускіх НПЗ было адгружана на ўкраінскі рынак 55,6 тысяч тон паліва, з Літвы 33 тысячы тон, з Польшчы 25 тысяч тон.