Парашэнка: Мы гатовыя да ўвядзення ваеннага становішча ў краіне

Прэзідэнт Украіны заяўляе, што гатовы да прыняцця пастановы аб увядзенні ваеннага становішча на ўсёй тэрыторыі краіны ў выпадку эскалацыі канфлікту.

Як паведамляе карэспандэнт УНИАН, пра гэта ён заявіў сёння падчас пашыранага пасяджэння ўрада з удзелам кіраўнікоў АДА.

«Магу падкрэсліць, што і я, і ўрад, і Вярхоўная Рада гатовыя да прыняцця пастановы аб увядзенні ваеннага становішча на ўсёй тэрыторыі краіны. І я ні ў якім разе не буду цягнуць з гэтай пастановай, калі безадказныя дзеянні агрэсара прывядуць да сур'ёзнай далейшай эскалацыі канфлікту», - сказаў Парашэнка.

Ён таксама заявіў, што Украіна і Еўразвяз на саміце «нармандскай чацвёркі» ў Менску будуць настойваць на безумоўным спыненні агню на ўсходзе Украіны.

«Магу вас запэўніць, што Украіна і Еўрапейскі Звяз выступяць з адзінай пазіцыяй на Менскім саміце. Мы будзем гаварыць адным голасам, і ключавая пазіцыя - мы адзначаем і настойваем: нам неабходнае безумоўнае, без якіх-небудзь папярэдніх патрабаванняў, спыненне агню», - сказаў кіраўнік дзяржавы.

З ягоных слоў, магчыма, сёння найбольш важная дата ў гісторыі Украіны.

Парашэнка таксама заявіў, што ад вынікаў сённяшняга саміту ў Менску ў «нармандскім фармаце» будзе залежаць, ці ўдасца спыніць агрэсара дыпламатычным шляхам.

«І магу сказаць, што за час працы на пасадзе прэзідэнта ў мяне, напэўна, не было і не будзе больш важнай сустрэчы, чым сённяшняя ў Менску. І ўсё вы разумееце, што ад вынікаў саміту будзе залежаць, ці ўдасца нам спыніць агрэсара дыпламатычным шляхам, або мы будзем пераходзіць на зусім іншы рэжым», - сказаў прэзідэнт Украіны.