Браніслаў Камароўскі: Перспектыва міру, мабыць, не блізкая

Прэзідэнт Польшчы Браніслаў Камароўскі мяркуе, што ключ да развязання канфлікту ў Данбасе ляжыць у Маскве, а не ў Кіеве.

Як паведамляе карэспандэнт УНІАН у Польшчы, пра гэта ён заявіў сёння ў Варшаве.

"Ключ да развязання праблемы, паводле майго пераканання, як і раней, ляжыць перш за ўсё ў Маскве. Гаворка пра тое, каб не ствараць уражанне, што ключ мае прэзідэнт Украіны ці Украіна. Ключ да развязання канфлікту ў палітычным і мілітарным сэнсе ў Маскве", - сказаў польскі прэзідэнт.

Камароўскі адзначыў, што польская ўлада чакае "адназначнай ацэнкі" дасягнутых у Менску дамоўленасцей ад украінскай улады, і запэўніў, што Польшча ў далейшым будзе падтрымліваць у гэтай сітуацыі ўкраінцаў.

"Польшча нязменна была, ёсць і будзе на баку Украіны. Краіны, на якую напалі. Мы не можам быць на баку тых, хто хоча ціснуць на Украіну, бо ціснуць трэба на агрэсара", - падкрэсліў Камароўскі.

Ён таксама адзначыў, што дасягнутыя яшчэ ў верасні мінулага года дамоўленасці аб мірным урэгуляванні канфлікту не былі выкананыя праз дзеянні прарасейскіх баевікоў.

"Адно з'яўляецца дакладным і гэта варта нагадаць, што папярэдняя дасягнутая ў Менску дамоўленасць не была выкананая праз дзеянні прарасейскіх сепаратыстаў на Данбасе. Гэта важная акалічнасць, на якую паказвае Польшча. Магчыма, гэта галоўная праблема на шляху ўвасаблення ў жыццё цяперашніх дамоўленасцей ў Менску", - адзначыў прэзідэнт Польшчы.

Камароўскі таксама выказаў меркаванне, што "перспектыва міру, мабыць, не блізкая", адзначыўшы, што палякі будуць "трымаць кулакі" за тое, каб атрымалася дамагчыся спынення баявых дзеянняў на ўсходзе Украіны.

Як паведамлялася, сёння, 12 лютага, у Менску паводле вынікаў перамоваў лідараў "нармандскай чацвёркі" зацверджаны комплекс мер, накіраваных на імплементацыю вераснёўскіх Менскіх дамоўленасцей. Акрамя таго, прынятая дэкларацыю лідараў Украіны, Францыі, Нямеччыны і РФ на падтрымку гэтых мерапрыемстваў.

Новыя дамоўленасці, дасягнутыя "нармандскай чацвёркай", прадугледжваюць спыненне агню з 15 лютага, а таксама адвод усіх цяжкіх узбраенняў.

Таксама прадугледжанае вызваленне і абмен усіх закладнікаў і незаконна ўтрыманых асоб на аснове прынцыпу "ўсіх на ўсіх". Гэты працэс павінен быць скончаны не пазней чым на пяты дзень пасля адводу цяжкай зброі.

Дамоўленасці прадугледжваюць і "вывад усіх замежных узброеных фармаванняў, вайсковай тэхнікі, а таксама наймітаў з тэрыторыі Украіны пад наглядам АБСЕ, раззбраення ўсіх незаконных груп".

Фота: prezydent.pl