Баевікі рыхтуюць захоп Дэбальцава і Марыупаля да 15 лютага

Менавіта з гэтага дня павінна пачаць дзейнічаць замірэнне, пра якое дамовіліся ў Менску.

Намеснік міністра абароны Украіны Пётр Мехед заявіў, што баевікам загадалі заняць Дэбальцава да нядзелі. Пра гэта ён сказаў на брыфінгу ў Кабінеце міністраў, піша LB.ua.

"На сённяшні дзень, пры наяўнасці дамоўленасці аб спыненні агню з поўначы 15 лютага, тэрарысты і расейскія войскі атрымалі задачу падняць сцяг у Дэбальцаве", - сказаў ён. З ягоных слоў, такая ж задача пастаўленая і ў дачыненні да Марыупаля, аднак калі за Дэбальцава ідуць жорсткія баі (паводле звестак Мехеда, за сённяшнюю раніцу горад атакавалі тройчы), то Марыупаль знаходзіцца пад моцным кантролем украінскіх войскаў.

Ён таксама паведаміў, што паводле апошняй інфармацыі на тэрыторыі Украіны знаходзіцца больш за 10 тысяч вайскоўцаў Узброеных сіл Расеі.

Групоўка ўкраінскіх войскаў у Дэбальцаве практычна заблакаваная расейскімі войскамі і баевікамі. Яны перакрылі асноўныя дарогі, якія вядуць з горада на свабодную тэрыторыю, але, паводле звестак народнага дэпутата Сямёна Сяменчанкі, прасёлачныя і палявыя дарогі па-ранейшаму свабодныя.

"Ніякага "катла" пад Дэбальцавам няма. Паўтараю яшчэ раз тое, пра што кажу ўжо некалькі дзён: праціўнік кантралюе населеныя пункты на трасе Арцёмаўск - Дэбальцава і дарозе Дэбальцава - Луганскае. Логвінава і Лазавое. Гэта называецца "аператыўнае атачэнне". Гэтая блакада абцяжарвае забеспячэнне групоўкі ў Дэбальцаве, вываз параненых. Але гэта ніякі не кацёл, бо ёсць маса прасёлкавых і палявых дарог, якія кантралююцца ВСУ і Нацгвардыяй, і забеспячэнне і вываз параненых адбываецца. Але ад гэтага не лягчэй і аператыўнае асяроддзе ў кожны момант пры бяздзейнасці камандавання можа стаць "катлом", - напісаў ён.

Аднак, як паведамляе журналіст Юрый Бутусаў, баевікі вядуць масіраваны артылерыйскі і мінамётны абстрэл украінскіх пазіцый.

"Пад прыкрыццём агню расейскія атрады штурмуюць нашы апорныя пункты, спрабуюць прарваць абарончы перыметр. Мірныя пагадненні ў Менску пакуль прывялі не да зніжэння напружанасці, а наадварот - да эскалацыі, - піша Бутусаў, - вораг засяродзіў у раёне Логвінава-Калінаўкі не менш за дзве батальённа-тактычныя групы, узмоцненыя артылерыйскімі часткамі. Знішчыць вузел супраціву Логвінава-Калінаўка можна толькі пры сур'ёзнай канцэнтрацыі сіл і сродкаў".