G7 пагражае новымі санкцыямі за зрыў менскіх дамоўленасцей

Лідары «Вялікай сямёркі» зрабілі сумесную заяву.

Краіны «Вялікай сямёркі» заяўляюць, што гатовыя ўжыць адпаведныя захады ўздзеяння супраць тых, хто не будзе выконваць новыя менскія дамоўленасці. Пра гэта гаворыцца ў распаўсюджанай у пятніцу, 13 лютага, заяве G7, паведамляе Liga.net.

«G7 гатовая прыняць адпаведныя захады супраць тых, хто парушае «менскі пакет», узмацняючы кошт для іх, асабліва супраць тых, хто не выконвае дамоўленасці аб усёабдымным спыненні агню і вывадзе цяжкага ўзбраення», - гаворыцца ў заяве.

Лідары Канады, Францыі, Нямеччыны, Італіі, Японіі, Вялікабрытаніі, ЗША, прэзідэнты Еўрапейскай рады і Еўракамісіі выказалі занепакоенасць у сувязі з абвастрэннем сітуацыі ў раёне Дэбальцава, дзе актывізаваліся дзеянні сепаратыстаў пры падтрымцы Расеі.

«Мы ў чарговы раз асуджаем незаконную анэксію Крыма Расеяй, што з'яўляецца парушэннем міжнароднага права», - таксама адзначыла «Вялікая сямёрка».

У заяве лідары самых развітых эканомік свету віталі пастанову МВФ аб надаванні Украіне крэдытнай праграмы ў 17,5 млрд даляраў.

Нагадаем, у Менску 12 лютага пасля цяжкіх перамоваў працягласцю блізу 15 гадзін лідары Украіны, Нямеччыны, Францыі і РФ, а таксама ўдзельнікі кантактнай групы ў спыненні вайны ў Данбасе адобрылі новае пагадненне. Вынікам сустрэчы стаў «Комплекс захадаў у выкананні Менскіх пагадненняў» - неадназначны для Украіны дакумент, адзін з пунктаў якога прадугледжвае спыненне агню ў Данбасе 15 лютага з 00 гадзін па кіеўскаму часу.

Пасля падпісання новага пагаднення аб урэгуляванні сітуацыі ў Данбасе на ўсходзе Украіны акупанты прадоўжылі актыўныя баявыя дзеянні па ўсёй лініі фронту.