Падчас перамоваў у Менску ва Украіну прыбылі 50 расейскіх танкаў
19- 14.02.2015, 9:49
- 41,150
Украіна расчараваная парушэннем РФ менскіх дамоўленасцей.
Пра гэта заявіў прадстаўнік Украіны ў ААН Юрый Сяргееў.
«Мы не хаваем нашага расчаравання, што кіраўніцтва Расеі неадкладна аддзяліла сябе ад працэсу імплементацыі (менскіх дамоўленасцей), настойваючы, што Расея не з'яўляецца бокам канфлікту.
Выклікам з'яўляецца і тое, што «лідары» Данецка і Луганска таксама неадкладна пасля падпісання дамоўленасцей выказалі сумневы ў рэальнасці іх выканання», - адзначыў Сяргееў у пятніцу, 13 лютага, на прэс-канферэнцыі ў штаб-кватэры ААН у Нью-Ёрку, паведамляе Радыё свабода.
«Для нас было непрымальнае і тое, што калі ішла сустрэча ў Менску, 50 новых танкаў, 40 гармат і 40 вайсковых аўтамабіляў прыбылі з Расеі для падтрымкі сепаратыстаў», - адзначае Сяргееў.
На сустрэчы ў Менску лідары Украіны, Расеі, Нямеччыны і Францыі дамовіліся аб спыненні агню ў Данбасе з 15 лютага. Акрамя таго, ад лініі судакранання павінна быць адведзенае цяжкае ўзбраенне.