Мянчанка пазбавілася працы за падтрымку Украіны

Наталля Гарачка пазбавілася працы за сваю пазіцыю ў дачыненні да вайны ва Украіне.

«Я працую ў страхавой кампаніі «Прамтрансінвест», і мы часта абслугоўваем розных чыноўнікаў. Вось і ў суботу 14 люты да нас па справах зайшоў чыноўнік з адміністрацыі прэзідэнта», - распавядае «Беларускаму партызану» грамадская актывістка і праваабаронца.

У гэты час яна глядзела на сваім кампутары дакументальны фільм пра палонных расейскіх вайскоўцаў, якія прыбылі ваяваць ва Украіну. Са слоў актывісткі, чыноўнік быў вельмі здзіўлены, убачыўшы фільм, у якім палонныя расейскія вайскоўцы называюць свае вайсковыя часткі і распавядаюць, як і навошта патрапілі ва Украіну.

«Яму вельмі не спадабаўся мой значок з бел-чырвона-белым сцягам і Пагоняй. А таксама не спадабалася мая пазіцыя ў дачыненні да вайны ва Украіне. Мы пачалі размову на гэтую тэму, праўда, у твар ён мне нічога не выказаў, нават не спрачаўся . Затое потым, вярнуўшыся ў адміністрацыю, падняў шум, маўляў, як можа такі чалавек, як я, з такімі поглядамі працаваць у кампаніі, якая абслугоўвае адміністрацыю прэзідэнта. Вынік: гэты чалавек патэлефанаваў у галаўны офіс і запатрабаваў неадкладнага майго звальнення», - кажа Наталля.

З яе слоў, супрацоўнікі на працы, а таксама кіраўніцтва, былі ў шоку ад такога загаду. Але заступацца за актывістку ніхто не стаў.

«Магчыма, адыграла ролю тое, што адміністрацыя прэзідэнта валодае 1% акцый кампаніі, таму іх пабойваюцца. Я ж не хачу цяпер марнаваць свае сілы і час на барацьбу з гэтымі чыноўнікамі і сістэмай. Не раз сутыкалася з імі і ведаю, што гэта такое», - адзначае актывістка.

Сёння яна актыўна займаецца зборам сродкаў і дапамогі для ўкраінскіх байцоў. «Я была на Майдане, ведала асабіста многіх загінулых там. І цяпер вайна ва Украіне для мяне - не просты гук. Таму дапамогу ўкраінцам для мяне - першасная мэта. Пакуль ва Украіне забіваюць людзей, усё астатняе значэння не мае, нават маё звальненне. Беларусь - наступная ў спісе, таму калі Украіна прайграе, вайна прыйдзе і да нас. Украінцы - байцы, мы ж так стаяць за сваё не зможам. Таму для мяне вельмі важна ўжо цяпер дапамагаць Украіне тым, чым я магу», - падагульніла Наталля.