Жыхары вуліцы Маякоўскага пратэстуюць супраць ушчыльнення

Жыхары Ленінскага раёна Менска выступаюць супраць ушчыльнення жылой забудовы.

Пра гэта БелаПАН паведаміў грамадскі актывіст Віктар Янчурэвіч. Паводле ягоных слоў, больш за адную тысячу грамадзян падпісаліся пад зваротам супраць зацвярджэння і рэалізацыі ў прапанаваным выглядзе праекта дэталёвага планавання тэрыторыі ў межах вуліцы Дзянісаўскай - вуліцы Маякоўскага - завулак Маякоўскага - чыгункі. Подпісы перададзеныя ў адміністрацыю Ленінскага раёна Менска, якая з 2 да 26 лютага праводзіць грамадскае абмеркаванне праекта рэканструкцыі гэтай тэрыторыі.

«Абурэнне грамадзян выклікаў намер праектантаў значна ўшчыльніць жылую забудову шматпавярховымі новабудамі каля дома 23 на вуліцы Козыраўскай і на тэрыторыі азеляненне двара на вуліцы Барадзінскай, 31, а таксама пашырыць вуліцу Вялікаморскую да трох палос з арганізацыяй аўтобуснага маршруту. На думку жыхароў раёна, праект рэканструкцыі павінен служыць мэце комплекснага добраўпарадкавання тэрыторыі, стварэння спрыяльнага асяроддзя жыццядзейнасці, забеспячэння аб'ектамі сацыяльнай інфраструктуры, паркоўкамі і стаянкамі аўтатранспарту, а не быць інструментам банальнай кропкавай забудовы свабодных дзялянак жылымі дамамі падвышанай паверхавасці», - адзначыў Янчурэвіч.

Ён паведаміў, што «галоўнымі праблемамі раёна грамадзяне называюць слаба развітую інфраструктуру, нізкая якасць дзіцячых і спартыўных пляцовак, катастрафічная нястача парковак, з прычыны чаго вуліцы і дваровыя тэрыторыі загрувашчаны аўтамабілямі». Праект рэканструкцыі павінен развязваць менавіта гэтыя праблемы, а не ствараць жыхарам новыя, мяркуюць гараджане.

Падвядзенне вынікаў грамадскага абмеркавання павінна адбыцца 27 лютага. «Грамадзяне спадзяюцца, што іх меркаванне будзе ўлічанае і праект будзе адпраўлены на дапрацоўку, а пры развязанні пытання не на карысць грамадскай думкі маюць намер абскардзіць пастанову і абараняць свае інтарэсы ў вышэйшых інстанцыях», - адзначыў актывіст.

На ягоную думку, «праблемы пры правядзенні грамадскіх абмеркаванняў горадабудаўнічых праектаў узнікаюць з прычыны недапушчэння грамадскасці да удзелу ў працэсе планавання».

«Ні Менгарвыканкам, ні праектныя інстытуты не ўважаюць за патрэбнае весці камунікацыю з гараджанамі на этапе распрацоўкі праекта развіцця канкрэтнай тэрыторыі, аддаючы перавагу сілай прапіхваць тое, што выгадна камусьці, але не гараджанам. Сёння ўладам горада пара задумацца аб змене падыходаў да горадабудаўніцтва і праектавання, наладжваць з грамадскасцю дыялог, а не навязваць неабдуманыя пастаноовы, наступствамі якіх з'яўляюцца пратэсты, недавер і ўзлаванасць», - мяркуе Янчурэвіч.