За збыт наркотыкаў пачнуць саджаць на 25 гадоў

З 4 лютага ў Беларусі становіцца больш жорсткай адказнасць за злачынствы, звязаныя з наркотыкамі.

Уваходзіць у дзеянне больш жорсткая рэдакцыя Крымінальнага кодэкса, папраўкі ў які ўнесеныя ў адпаведнасці з прэзідэнцкім дэкрэтам "Аб неадкладных мерах у супрацьдзеянні незаконнаму абароту наркотыкаў".

Закон пра змены ў КК быў прыняты абедзвюма палатамі парламента і падпісаны прэзідэнтам сёлета ў студзені, паведамляе Нацыянальныя прававы партал. Мэтай паправак з'яўляецца ўзмацненне жорсткасці пакарання за злачынствы, звязаныя з наркотыкамі, піша "Штодзённік".

Так, цяпер да адказнасці за незаконны абарот наркатычных сродкаў, псіхатропных рэчываў, іх прэкурсораў або аналагаў могуць прыцягвацца падлеткі ва ўзросце ад 14 гадоў.

Акрамя таго, да 25 гадоў пазбаўлення волі падымаецца верхняя планка пакарання за незаконны абарот наркатычных сродкаў, псіхатропных рэчываў, іх прэкурсораў або аналагаў.

Новая фармулёўка ч. 3 арт. 327 (крадзеж наркатычных сродкаў, псіхатропных рэчываў, іх прэкурсораў і аналагаў), у якой ідзе гаворка пра аналагі наркотыкаў і псіхатропаў, звужае магчымасці наркадзяльцоў у вырабе "легальных" версій забароненых да абароту рэчываў.

Узмацняецца пакаранне за продаж або перадачу наркотыку заведама непаўналетняму. Цяпер за такія дзеянні вінаваты можа атрымаць да 15 гадоў пазбаўлення волі.