9 з 10 кніг у Беларусі выдаюцца па-расейску
6- 3.02.2015, 17:13
- 6,364
Удзельная вага кніг, выдадзеных на беларускай мове за апошнія тры-чатыры гады, складае каля 10-11%.
Пра гэта паведаміла 3 лютага на прэс-канферэнцыі, прысвечанай правядзенню XXII Менскай міжнароднай кніжнай выставы-кірмашу, міністр інфармацыі Лілія Ананіч, піша БелаПАН.
"Гэтыя лічбы адлюстроўваюць рэальны моўны стан кнігавыдання ў краіне", - мяркуе яна.
Са слоў Ананіч, асноўнымі выдаўцамі кніг на беларускай мове выступаюць выдавецтвы "Мастацкая літаратура", "Звязда", "Беларуская навука", "Народная асвета", "Аверсэў", "Чатыры чвэрці", "Белы вецер".
Агульная колькасць выдадзеных у 2014 годзе ў Беларусі кніг склала 11 613.
"Кожны год колькасць выдадзеных у Беларусі кніг на аднаго жыхара краіны не змяншаецца - сёння гэта 3,3 асобніка, - сказала міністр. - І гэты паказчык супастаўны з расейскімі паказчыкамі".
Наклад выдадзеных кніг - 31,2 млн асобнікаў. "Па назвах мы прыраслі на 1,5%, наклад зменшыўся на 0,5%", - адзначыла Ананіч. Сярэдні наклад кнігі 2,7 тысячы экзэмпляраў.
Са слоў міністра, у краіне налічваецца 450 выдавецкіх арганізацый, большасць з якіх з'яўляюцца недзяржаўнымі, і больш за 750 распаўсюджвальнікаў друкаванай прадукцыі.