Заявы беларускага міністра аб АЧС здзівілі Рассельгаснагляд

Рассельгаснагляд здзіўлены заявай кіраўніка Мінсельгасхарчу Беларусі Леаніда Зайца аб адсутнасці на тэрыторыі краіны афрыканскай чумы свіней.

Спаслаўшыся на публікацыі беларускіх СМІ, служба прывяла выказванні міністра з нагоды таго, што беларуская прадукцыя "бяспечная, і сёння няма падставы казаць пра тое, што ў краіне ёсць АЧС", што методыка вызначэння геному віруса АЧС у расейскіх лабараторыях "не ўзаконеная на пляцоўцы АЭП, яна таксама афіцыйна не адобраная Міжнародным эпізаатычным бюро. Узоры вырабаў беларускага мяса адбіраюцца без удзелу ў гэтым нашых спецыялістаў", піша "Інтэрфакс".

У сувязі з гэтым Рассельгаснагляд падкрэслівае, што ва Усерасейскім навукова-даследчым інстытуце ветэрынарнай вірусалогіі і мікрабіялогіі (УНДІВВіМ), які з'яўляецца адным з найбольш аўтарытэтных сусветных навуковых цэнтраў у галіне дыягностыкі і барацьбы з захворваннямі жывёл, яшчэ ў 2008 годзе была створаная тэст-сістэма для выяўлення ДНК віруса АЧС. "Пры гэтым сама тэст-сістэма, якая ўжываецца для малекулярна-генетычнай дэтэкцыі віруса АЧС у аб'ектах ветэрынарна-санітарнага нагляду, валодае высокай аналітычнай адчувальнасцю, 100%-й спецыфічнасцю і ўзнаўляльнасцю, што адпавядае найлепшым замежным узорам", - гаворыцца ў паведамленні.

Рассельгаснагляд нагадвае і аб міжнародным прызнанні аналітычнай сістэмы УНДІВВіМ. "У рамках двухбаковага твінінг-праекту рэферэнтнай лабараторыі што да афрыканскай чумы свіней Міжнароднага эпізаатычнага бюро і УНДІВВіМ ФІТЦ-каньюгаты АЧС вытворчасці УНДІВВіМ прайшлі тэставанне ў Сенегале пры палявых выблісках АЧС для выяўлення антыгена віруса, былі адзначаныя іх высокая спецыфічнасць і поўная прыдатнасць да лабараторнай дыягностыкі", - паведамляе Рассельгаснагляд.

Пры гэтым служба нагадвае, што, каб пазбегнуць тэхнічных памылак, аналіз узораў прадукцыі, уключаючы беларускую гатовую прадукцыю, якая паступае на расейскі рынак, праводзіцца двойчы - у рэгіянальнай лабараторыі Рассельгаснагляду і ў профільнай лабараторыі УНДІВВіМ.

Рассельгаснагляд таксама нагадаў, што геном віруса АЧС у беларускай гатовай мясной прадукцыі выяўляўся не толькі Рассельгаснаглядам, але і ветэрынарнымі службамі іншых краін, якія імпартуюць беларускую мясную прадукцыю, прынамсі, Літвы і Латвіі.

"Выклікае пэўнае здзіўленне і заява аб тым, што ўзоры вырабаў беларускага мяса адбіраюцца без удзелу беларускіх спецыялістаў, - гаворыцца ў паведамленні. - Справа ў тым, што запрашэнне прадстаўнікоў ветэрынарных службаў краін-пастаўшчыкоў пры маніторынгавых даследаваннях на бяспеку не практыкуецца ні ў воднай краіне свету і не прадугледжанае рэкамендацыямі Міжнароднага эпізаатычнага бюро".