«Газпрам» рэзка павялічыў аб'ёмы паставак газу ў Еўропу

«Газпрам», што летась у верасні скараціў аб'ёмы паставак газу ў Еўропу, вярнуў іх на ранейшы ўзровень.

Пра гэта піша ў аўторак газета «Коммерсантъ». Выданне прыводзіць звесткі еўрапейскіх газатранспартных аператараў на 6 сакавіка, згодна з якімі транзіт праз Украіну вырас амаль на 40%. Блізу 70% дадатковага газу пайшло ў Італію, астатняе - у паўднёвую Нямеччыну. Таксама «Газпрам» амаль удвая павялічыў падачу газу праз Nord Stream, прыкладна да 95 млн кубаметраў у дзень. Загрузка газаправода Ямал- Еўропа вырасла на 19%, да 82 млн. кубаметраў у дзень. Дадатковы газ па іх быў прыкладна пароўну размеркаваны паміж Нямеччынай і краінамі Паўночна-Заходняй Еўропы, піша РБК.

Пракаментаваць выданню прычыны такога рэзкага аб'ёму паставак газу «Газпрам» адмовіўся. У верасні мінулага года «Газпрам» скараціў аб'ёмы паставак газу Еўропе. Такім чынам манаполія спрабавала змагацца з рэверсам газу ва Украіну. Аднак прыём не спрацаваў. Пазней «Газпрам» знізіў да мінімальных узроўняў пастаўкі па Nord Stream і Ямал-Еўропа, што, на яго задуму, павінна было прывесці да вычарпання запасаў газу ў сховішчах і росту коштаў на спотавым рынку, што зрабіла б рэверс ва Украіну камерцыйна нявыгадным. Аднак, нягледзячы на тое, што запасы ў еўрапейскіх ПСГ да пачатку сакавіка ўпалі да мінімуму, кошт газу на споце сур'ёзна не змяніўся, адзначае газета. Крыніцы выдання ў манаполіі звязваюць павелічэнне паставак газу з сустрэчамі, якія прайшлі 5 сакавіка.

Тады да Уладзіміра Пуціна прыязджаў прэм'ер Італіі Матэа Рэнца, а да кіраўніка "Газпрама" Аляксея Мілера - кіраўнік аднаго з найстарэйшых партнёраў манаполіі, нямецкі Wintershall Райнэр Зэле. Суразмоўца выдання мяркуюць, што Зэле мог пераканаць «Газпрам» павялічыць пастаўкі, альбо на сустрэчы з Рэнца маглі быць дасягнутыя і палітычныя дамоўленасці, напрыклад, паводле еўрапейскіх санкцый. Паводле звестак выдання, пастанова «Газпрама» павялічыць аб'ёмы паставак стала нечаканай для Заходняй Еўропы. Асаблівых асцярог у газавых кампаній з нагоды недахопу газу там не было. «Цяпер спотавыя СПГ у Заходняй Еўропе можна купіць за $250 за тысячу кубаметраў, неабходнасці ў расейскім газе няма», - прыводзіць выданне словы аднаго са сваіх суразмоўцаў.

Аб павелічэнні Расеяй аб'ёмаў прапампоўвання газу праз газатранспартную сістэму Украіны абвясціў увечары ў панядзелак і Пятро Парашэнка. У інтэрв'ю «Першым нацыянальным тэлеканале» ўкраінскі прэзідэнт заявіў, што расейскі бок павялічыў заяўку ў прапампоўцы газу на 68%. Гэта, з ягоных слоў, прывяло да «абвалу рынку». «Сёння мы будзем купляць газ па $245 паводле рэверсу», - сказаў Парашэнка. Ён падкрэсліў, што Украіна цалкам дыверсіфікавала механізм паставак газу і што гэта заслуга ягонай каманды.

«Мы пра гэта казалі і марылі 23 гады. Мы, мая каманда гэта зрабіла», - цытуе Парашэнку Интерфакс. У той жа час «Коммерсантъ» заўважае, што ў сувязі з павелічэннем прапампоўкі газу сітуацыя для Украіны ўскладнілася.

У пятніцу «Нафтагаз» зноў абвінаваціў «Газпрам» у парушэнні кантракту, нагадаўшы, што манаполія не мае права без папярэдняга папярэджання так рэзка павялічваць дзённы паток. Украінскай кампаніі ў выніку прыйшлося адмовіцца ад запампоўвання ў ПСГ і вярнуцца да адбору газу. Калі адбор прадоўжыцца, наступную перадаплату «Нафтагазу» трэба будзе аплаціць ўжо сёння.