Купіць электронныя грошы цяпер можна толькі з пашпартам

Купіць электронныя грошы ў аддзяленнях сувязі Беларусі з 15 сакавіка можна толькі на падставе дакумента, які сведчыць асобу плацельшчыка.

Гэта прадугледжанае пастановай праўлення Нацыянальнага банка №85 ад 19 лютага 2015 года, якая афіцыйна апублікаваная сёння на Нацыянальным прававым інтэрнэт-партале, паведамляе карэспандэнт БелТА.

У пастанове сказана, што прыём плацяжоў гатоўкай ад фізічных асоб для пералічэння на рахункі ў банках у мэтах куплі электронных грошай праводзіцца ў аперацыйных касах на падставе дакумента, які сведчыць асобу (даведкі, якая пацвярджае асобу) плацельшчыка. Да такіх дакументаў належаць пашпарт грамадзяніна Рэспублікі Беларусь, від на жыхарства ў Беларусі, пасведчанне бежанца, пашпарт замежнага грамадзяніна або асобы без грамадзянства альбо іншы дакумент, які яго замяняе, прызначаны для выезду за мяжу і выдадзены адпаведным органам дзяржавы грамадзянскай прыналежнасці альбо звычайнага месца жыхарства замежнага грамадзяніна (асобы без грамадзянства) альбо міжнароднай арганізацыяй.

Пры гэтым у касавым абсталяванні будуць фіксавацца прозвішча, уласнае імя, імя па бацьку (калі такое маецца), месца жыхарства, месца знаходжання, рэквізіты дакумента, які сведчыць асобу (даведка, якая пацвярджае асобу) плацельшчыка.

Пастанова праўлення Нацбанку №85 уносіць змены ў інструкцыю аб парадку вядзення касавых аперацый і арганізацыі працы з гатоўкай у беларускіх рублях і з гатоўкай замежнай валюты арганізацыямі, падпарадкаванымі Міністэрству сувязі і інфарматызацыі. Падставай для гэтага паслужылі патрабаванні дэкрэта №6 «Аб неадкладных захадах у супрацьдзеянні незаконнаму абарачэнню наркотыкаў». Як растлумачылі ў Нацбанку, такія захады дазволяць выключыць ананімнасць выкарыстання электронных гаманцоў, чым раней карысталіся зламыснікі для распаўсюджвання наркатычных сродкаў і псіхатропных рэчываў на тэрыторыі краіны.

Дакумент уваходзіць у дзеянне пасля афіцыйнага апублікавання.