Мінгандлю адпускае кошты: падаражэе ўсё

Кошты ў Беларусі бліжэйшым часам перастануць кантралявацца ўладамі.

Пра гэта падчас наўпроставай лініі Белтэлерадыёкампаніі распавяла намесніца міністра гандлю Ірына Наркевіч.

"Паэтапная лібералізацыя плануецца, хутка будзе поўнае адпусканне, - заявіла чыноўніца. - У нас падыходы ў законе коштаўтварэння такія, што кошт фармуецца свабодна, але ён павінны быць абгрунтаваны. Абгрунтаваныя выдаткі павінны ў яго ўключацца. Будуць кантралявацца толькі кошты сацыяльна значных тавараў, работ і паслуг паводле пераліку, які вызначаецца Саветам міністраў".

Намесніца міністра нагадала, што гэтая тэма шырока абмяркоўвалася, пачынаючы са снежня, "калі быў паэтапны пераход: спачатку - мараторый на кошты, потым дазволілі падняць іх на пэўны працэнт".

Што тычыцца сітуацыі з коштамі ў Беларусі і іншых краінах ЕАЭС, намесніца міністра адзначыла, што аптымальным варыянтам было б выраўноўванне коштаў. Аднак гэта не так хутка і не так проста.

"З улікам якіх-небудзь умоў, мясцовых, кліматычных і гэтак далей, варыянту паступлення тавару, ды і валюта пакуль розная ў кожнай краіне (...). Тут шмат аб'ектыўных прычын, якія, у прынцыпе, могуць быць і ў вытворчасці, сабекошце гэтага тавару , розныя падаткі. Вельмі шмат фактараў, якія ўплываюць на гэты працэс. Кошт, вядома, розны цяпер. І нейкі сегмент тавару можа быць таннейшы ў РФ, але асноўная група тавараў, калі мы маніторынг праводзілі, вядома, у Беларусі таннейшая. Асабліва прадукты харчавання, - сказала Ірына Наркевіч. - Так, у асобных абласцях, Разанскай, у Смаленску, - адны кошты, у Маскве - іншыя".

Мінус сітуацыі, калі тавар прадаюць па розным кошце, - гэта ператок тавару.

"Гэта вечныя працэсы, патокі людзей, якія перамяшчаюцца на памежжы. І мы гэтую тэму ўжо праходзілі, калі ў нас быў нізкі коштавы сегмент тавар ... Тым больш у нас няма межаў - свабоднае перамяшчэнне тавару прысутнічае. Таму імкнуцца мы, вядома, да гэтага павінны. Але мы не павінны забываць у Рэспубліцы Беларусь, што ў нас сацыяльна арыентаваная дзяржава і коштавы паказчык, вельмі важны для спажыўца", - падкрэсліла намесніца міністра.

Нагадаем, пасля дэвальвацыі, якая прайшла 19 снежня мінулага года, Мінгандлю забараніў падымаць кошты на няпэўны час. Пазней улады вызначылі правілы фармавання (вызначэння) коштаў. Прынамсі, згодна з дакументам, адпускны кошт можа быць павялічаны вытворцам на велічыню змены кошту імпартных сыравіны і матэрыялаў, якія паступаюць з трэціх краін (краін, якія не ўваходзяць у Еўразійскі эканамічны саюз) і паступілі пасля 18 снежня 2014 г., з улікам яго долі ў адпускным кошце. Пры гэтым павелічэнне коштаў сыравіны і матэрыялаў айчыннага паходжання, а таксама завезеных з краін Еўразійскага эканамічнага саюза, не дапускаецца.