Украіна перадасць у Гаагу матэрыялы супраць Пуціна і Шайгу
15- 18.03.2015, 20:01
- 21,075
Украіна сабрала матэрыялы для падачы другой заявы ў Міжнародны крымінальны суд у Гаазе.
Заяву тычыцца выказванняў прэзідэнта Расеі Уладзіміра Пуціна і міністра абароны Сяргея Шайгу наконт Крыму. Пра гэта ў сераду на брыфінгу паведаміў міністр юстыцыі Паўло Пятрэнка, паведамляе "Інтэрфакс-Украіна".
"Таксама праводзілася экспэртыза выказванняў грамадзяніна Пуціна і грамадзяніна Шайгу ў фільме, які трансляваўся ў Расеі з нагоды захопу Крыму, гэтыя матэрыялы мы цяпер сфармавалі і перадаем у Генеральную пракуратуру і менавіта яна будзе камунікаваць з міжнароднымі пракурорамі гэтага суда", - заявіў ён.
Пятрэнка ўдакладніў, што гаворка ідзе пра Міжнародны крымінальны суд у Гаазе.
Міністр нагадаў, што Вярхоўная Рада ў лютым прыняла пастанову аб заяве ў гэты суд у сувязі з ацэнкамі тых злачынстваў, якія былі ўчыненыя расейскімі службовымі асобамі і расейскімі вайскоўцамі, а таксама тых асоб, якіх яны падтрымалі на ўсходзе Украіны і ў Крыме.
Кіраўнік Мінюста нагадаў, што першай заявай у Гаагу былі матэрыялы аб злачынствах, учыненых Януковічам і ягоным асяроддзем.
Паводле ягоных слоў, гэта заява была накіраваная летась, і ўжо адбылася першая камунікацыя міжнародных пракурораў з Генеральнай пракуратурай ва Украіне.
Як вядома, у сераду на пасяджэнні ўрада прэм'ер Арсеній Яцэнюк даручыў Мінюсту і МЗС разам з Генпракуратурай падрыхтаваць пазоў супраць Пуціна ў Гаагу.