Загадкавы будынак у Эстоніі прывёў у тупік гісторыкаў

Эстонскія гісторыкі не змаглі вызначыць прызначэнне будынка з трубой побач з былымі фабрычнымі казармамі Крэнгольма на вуліцы Хайгла ў Нарве.

Пра гэта паведамляе сайт Err.ee.

У рэгістры помнікаў даўніны будынак значыцца як печ. Яна пабудаваная ў канцы XIX стагоддзя з чырвонай цэглы. Першапачаткова меркавалася, што збудаванне з трубой прызначалася для спальвання смецця, паводле аналогіі з падобнымі будынкамі ў Англіі, адкуль была імпартаваная архітэктура фабрычнага раёна Крэнгольма, і дзе сапраўды былі ўстаноўкі для спальвання смецця.

Аднак падчас рэстаўрацыі ў 2011 годзе на сценках так званай печы не знайшлі слядоў гару. Крыху пазней высветлілася, што будынак, які нагадвае печ, знаходзіцца над старым каналізацыйным калектарам, таму гісторыкі мяркуюць, што пабудова магла служыць у якасці вентыляцыйнай шахты, і вядома, што падобныя будынкі першапачаткова знаходзіліся на тэрыторыі мануфактуры.

Паколькі з 1930-х гадоў так званая печ выкарыстоўвалася толькі ў якасці памыйніцы, а дакументальных звестак аб яе пабудове не захавалася, навукоўцам прыходзіцца здавольвацца гіпотэзамі.