Камітэт Еўрапарламента ўхваліў выдачу Украіне €1,8 мільярдаў
1- 19.03.2015, 14:02
- 4,429
Еўрапарламент вызначыцца з пакетам дапамогі Украіне на наступным тыдні.
Камітэт замежнага гандлю Еўрапарламента на сваім пасяджэнні ў Брусэлі ў чацвер ухваліў праект дакладу Габрыэліюса Ландсбэргіса (група народных партый, Літва) аб выдачы макрафінансавай дапамогі Украіне. Як паведамілі ў прэс-службе групы народных партый, камітэт, сярод іншага, ухваліў пакет дапамогі на 1,8 млрд еўраў, піша "Корреспондент".
"Сённяшняя пастанова даводзіць наяўнасць моцнага кансэнсусу сярод палітычных сіл у Еўрапейскім парламенце для ўхвалення гэта беспрэцэдэнтна вялікага пакета без далейшых прамаруджванняў", - заявіў Ландсбэргіс.
Мяркуецца, што Еўрапарламент вызначыцца з пакетам дапамогі Украіне на наступным тыдні падчас міні-сэсіі ў Брусэлі.
Новая праграма дапамогі, прапанаваная Еўракамісіяй 8 студзеня, стане трэцяй праграмай для Украіны.
Макрафінансавая дапамога будзе давацца трыма ратамі: першыя дзве будуць выплачаныя ў другой палове 2015 года, трэцяя - на пачатку 2016 года.
У рамках першых дзвюх праграм Кіеў ужо атрымаў 1,36 млрд еўраў з 1,61. Астатнія 250 млн еўраў будуць выплачаныя найбліжэйшым часам.