Генадзь Фядыніч: Вымушаныя адпачынкі - гэта першыя кветачкі

Калі ў Беларусі пачнуцца галодныя бунты працоўных?

Лідар прафзвязу работнікаў радыёэлектроннай прамысловасці Генадзь Фядыніч распавёў «Салiдарнасцi» аб тым, ці гатовыя працоўныя беларускіх прадпрыемстваў да галодных бунтаў або пры сустрэчы будуць воплескі Лукашэнку, як зрабілі прадпрымальнікі «Экспабела».

Паводле звестак Белстата, амаль 60 тысяч беларусаў у студзені схадзілі ў адпачынак за свой кошт. За год колькасць супрацоўнікаў, якіх наймальнікі перавялі на скарочаны графік працы, вырасла больш чым удвая.

- Гэтая тэндэнцыя будзе працягвацца, - прагназуе кіраўнік прафзвязу РЭП Генадзь Фядыніч. - Афіцыйная статыстыка не адлюстроўвае поўнай карціны. Гэта першыя кветачкі. Мы яшчэ не бачылі статыстыкі за люты і сакавік.

Суразмоўца адзначае, што на працуючых вытворчасцях заробак рабочых абрынуўся з 500 да 300-350 даляраў.

- Ніколі за час кіравання Лукашэнкі прамысловыя прадпрыемствы не прастойвалі так, як цяпер, - звяртае ўвагу лідар прафзвязу.

Са слоў Генадзя Фядыніча, настроі сярод працоўных цяпер не самыя вясёлыя, але крытычная мяжа, пасля якой людзі выйдуць пратэставаць на вуліцу, пакуль не дасягнутая.