Расея байкатавала ў Радзе Бяспекі ААН абмеркаванне правоў чалавека ў Крыме

Рф падтрымалі Кітай, Венесуэла і Ангола.

Сталыя чальцы Рады Бяспекі ААН Расея і Кітай, а таксама чальцы Рады бяспекі Венесуэла і Ангола адмовіліся ўдзельнічаць у паседжанні, на якім абмяркоўвалася пытанне аб правах чалавека ў Крыме.

Пра гэта паведамляе NEWSru.com са спасылкай на агенцтва Reuters.

Сустрэча адбылася з ініцыятывы Літвы па так званай "формуле Арыя", якая прадугледжвае ўдзел не толькі чальцоў РБ, але і запрашэнне прадстаўнікоў іншых ведамстваў і арганізацый, паведамляе ТАСС.

Расейскае прадстаўніцтва пры ААН яшчэ да пачатку сустрэчы абвясціла аб тым, што РФ не будзе ў ёй удзельнічаць. Сталае прадстаўніцтва назвала гэтае пасяджэнне "контрпрадуктыўным і правакацыйным, якое не ўваходзяць у сферу кампетэнцыі Рады Бяспекі".

Сталая прадстаўніца Літвы пры ААН Раймонда Мурмакайтэ, паведаміўшы журналістам аб краінах, якія праігнаравалі пасяджэнне, заявіла: "Расея заўсёды вельмі хутка выступае з крытыкай Украіны, абвінавачваючы яе ў парушэнні правоў чалавека, аднак цалкам ігнаруе парушэнне правоў чалавека пад сваім кантролем або кіраваннем".

Раней прэс-аташэ сталага прадстаўніцтва Літвы Рута Язукевічутэ паведамляла, што на нараду запрошаныя ўсе краіны - чальцы ААН, а не толькі Рады бяспекі. Мэтай сустрэчы яна называла наданне чальцам РБ і іншым краінам магчымасці "атрымаць з першых рук інфармацыю аб сітуацыі ў галіне правоў чалавека і свабоды СМІ, становішчы нацыянальных меншасцяў, а таксама даведацца пра апошнія падзеі ў Крыме і на ўсходзе Украіны".

У дыпмісіі пры старшынстве ў РБ ААН Францыі журналістам заяўлялі, што Расея адзіная паведаміла аб няўдзеле ў сустрэчы. Аднак пазней высветлілася, што байкатавалі пасяджэнне яшчэ тры краіны. Пазіцыя Расеі складаецца ў тым, што пытанні Крыму з'яўляюцца ўнутранай справай краіны, бо паўвыспа - суб'ект Расейскай Федэрацыі.