Польскі генерал: Расея спрабуе пачаць у нашай краіне гібрыдную вайну

Польшча ўсё больш баіцца, што Расея можа пачаць супраць яе такую ж гібрыдную вайну, якую Масква вядзе ва Украіне.

Пра гэта заявіў кіраўнік бюро нацыянальнай бяспекі Польшчы, генерал Станіслаў Казей у інтэрв'ю часопісу Newsweek, піша Иносми.ру.

На ягоную думку, такая гібрыдная вайна вялася б не ў выглядзе беспасярэдняй вайсковай агрэсіі супраць Польшчы, а праводзілася б у форме, якая б не давала NATO падставаў для выканання сваіх абавязанняў у рамках дамовы аб калектыўнай бяспецы. Замест гэтага ўварванне Расеі ў Польшчу вялося б з дапамогай прапаганды і дыверсійных дзеянняў.

«У нас ужо не будзе ранейшай упэўненасці і стабільнасці ў выпадку ўзнікнення такіх пагроз, якія фармальна назваць вайной нельга - схаваная агрэсія, падрыўная дзейнасць, на якія пасля анэксіі Крыма Расеяй ужо нельга не звяртаць увагі», - заявіў генерал.

У кастрычніку 2014 года ў Польшчы былі арыштаваныя двое падазраваных у шпіянажы на карысць расейскай вайсковай разведкі (ГРУ). Адзін з падазраваных быў афіцэрам польскага войска, а другі працаваў адвакатам у Варшаве, і ў яго было падвойнае грамадзянства. Мяркуецца, што абодва шпіёны з'яўляюцца чальцамі групы, якая складаецца з дзесятка агентаў ГРУ, якія збіраюць звесткі на тэрыторыі Польшчы.

Польшча распачала захады ў адказ супраць настойлівых дзеянняў Расеі, заняўшы больш актыўную і ініцыятыўную пазіцыю ў NATO. Яна павялічыла свой вайсковы бюджэт. Пры гэтым, згодна з дамоўленасцямі сябраў NATO аб абаронных выдатках, Варшава паабяцала да 2016 года вылучыць на абарону 2% ад свайго УБП.

«Тое, што Польшча асцерагаецца экспансіі Расеі, абумоўлена, у тым ліку, і яе геаграфічным становішчам. На ўсходзе Польшча мяжуе з Украінай і расейскім хаўруснікам Беларуссю, а ў яе паўночна-ўсходняй мяжы знаходзіцца расейскі эксклаў Калінінградская вобласць», - сказана ў публікацыі.

Выданне нагадвае, што Расея назвала Калінінградскую вобласць тэрыторыяй асаблівага значэння ў рамках сваёй новай вайсковай дактрыны, агучанай летась. З 2012 года на тэрыторыі Калінінградскай вобласці размешчаны балістычныя ракеты малой далёкасці, а ў сакавіку Расея перадыслакавала ў гэты рэгіён аператыўна-тактычныя ракетныя комплексы Іскандэр. На тэрыторыі вобласці таксама грунтуецца расейскі Балтыйскі флот і размешчаныя дзве вайсковыя авіябазы - у горадзе Чэрняхоўск і ў пасёлку Данскі.

«Выкарыстоўваючы гэтыя авіябазы, Расея пасля пачатку крызісу на Украіне змагла ажыццявіць некалькі правакацыйных палётаў, урываючыся ў паветраную прастору NATO», - адзначае выданне.

Расейскія самалёты-шпіёны, знішчальнікі і бамбавікі неаднаразова ўчынялі такія палёты з Калінінградскай вобласці, пасля чаго іх перахаплялі патрульныя самалёты NATO, вялі дзяжурства над Балтыйскім морам.