На прыгарадных маршрутах трэба будзе плаціць за кіламетры

30 сакавіка Менсктранс плануе ўвесці дыферэнцаваную аплату праезду для прыгарадных маршрутаў.

Кошт квітка будзе залежаць ад адлегласці, якую трэба праехаць. Калі сістэма сябе зарэкамендуе, яе ўвядуць і для грамадскага транспарту ў Менску.

Кошт праезду ў сталічным транспарце стабільна расце кожныя некалькі месяцаў. Нагадаем, роўна год таму, у красавіку 2014 года, праезд каштаваў 3700 рублёў. У жніўні - ужо 4000, а за два тыдні да Новага года паездка падаражэла да 4,5 тысячы рублёў. І вось Менгарвыканкам з Міністэрствам эканомікі ўзгаднілі новы тарыф, піша «Комсомольская правда в Беларуси».

- З сярэдзіны красавіка (дакладная дата падвышэння пакуль невядомая) звычайны квіток будзе каштаваць 5000 рублёў, пры куплі ў кіроўцы - 5500, а на аўтобусы экспрэс-маршрутаў - 6500 рублёў, - назвала новыя кошты начальніца фінансава-эканамічнай управы Менсктрансу Ганна Міхайлоўская. - Праязны на адзін від транспарту абыдзецца ў 225 тысяч.

Дарэчы, паводле інфармацыі Менсктрансу, сабекошт паездкі ў метро складае 7200 рублёў, а ў аўтобусах, тралейбусах і метро - 9800.