Кошты нафты знізіліся

Кошт WTI апусціўся да 50,43 даляра за барэль. Кошт Brent знізіўся да 58,22 даляра за барэль.

Сусветныя кошты нафты дэманструюць негатыўную дынаміку ў пятніцу, 27 сакавіка, на фоне чаканняў інвестараў, што баявыя дзеянні, якія адбываюцца ў Емене, не пагражаюць перабоямі сусветных паставак «чорнага золата». На 07:15 паводле Менску кошт травеньскага ф'ючэрса на паўночнаморскую сумесь нафты маркі Brent знізіўся на 1,64% - да 58,22 даляра за барэль. Кошт травеньскіх ф'ючэрсаў на нафту маркі WTI абрынуўся на 1,94% - да 50,43 даляра за барэль, піша «Корреспондент».

У ноч на 26 сакавіка ў Емене пачалася міжнародная вайсковая аперацыя, у якой бярэ ўдзел шэраг краін рэгіёну. Аперацыя пачалася адразу пасля заявы Рады супрацоўніцтва дзяржаў Персідскага заліва, у якім адзначалася, што Саудаўская Арабія, Кувейт, Бахрэйн, ААЭ і Катар «маюць намер адгукнуцца на просьбу прэзідэнта Абд Рабу Мансура Хадзі і абараніць законную ўладу ў Емене ад баевікоў-хусітаў».

Да вайсковай аперацыі ўжо афіцыйна далучыліся Егіпет, Іарданія і Судан. На гэтым фоне сусветныя кошты нафты рэзка падскочылі.

Аднак пазней аналітыкі Goldman Sachs заявілі, што баявыя дзеянні ў Емене зробяць нязначны ўплыў на пастаўкі нафты. З іх слоў, краіна з'яўляецца невялікім экспарцёрам «чорнага золата» - здабыча Емена складае 145 тысяч барэляў у дзень.

«Емен - маленькі вытворца. Рост коштаў выкліканы асцярогамі магчымай эскалацыі і пераходу баявых дзеянняў у бок праліва Баб-эль-Мандэбскі», - мяркуюць аналітыкі Goldman Sachs.

Раней прадстаўнік Саудаўскай Арабіі ў АПЕК Мухамед аль-Мадзі заявіў, што кошты нафты не вернуцца да адзнакі 100 даляраў за барэль, паколькі гэта будзе нявыгадна асноўным пастаўшчыкам.