Тры калоны вайсковай тэхнікі ЗША прыбудуць у Чэхію
5- 29.03.2015, 16:19
- 8,668
Тры калоны вайсковай тэхнікі ЗША ў нядзелю, 29 сакавіка, заязджаюць у Чэхію, праязджаючы транзітам з Польшчы ў Нямеччыну.
У панядзелак, 30 сакавіка, яны павінны сустрэцца на ўскраіне сталіцы Чэхіі Прагі, правесці там у аўторак, 31 сакавіка, дзень адчыненых дзвярэй, а ў сераду, 1 красавіка, выехаць з краіны, паведамляе «Радыё Свабода».
Амерыканскія войскі вяртаюцца на свае базы ў Нямеччыне пасля вучэнняў у Польшчы.
Як адзначыў урад Чэхіі, які даў дазвол на праезд, такім чынам краіна выконвае саюзніцкія абавязанні ў дачыненні да партнёраў у NATO.
Прэзідэнт Чэхіі Мілаш Зэман заяўляў, што тыя, хто называе вайсковую калону акупацыйнай, з'яўляюцца «антыамерыканскімі вар'ятамі». «Я не згодны з тым, каб амерыканскія войскі былі пазначаныя як акупацыйныя, з той простай прычыны, што ў мінулым стагоддзі мы перажылі акупацыю двойчы і ведаем, як гэта выглядае», - падкрэсліў ён.
Праход аўтакалон суправаджаецца ў Чэхіі некаторымі антыамерыканскімі пратэстамі левых сілаў, а таксама акцыямі ў падтрымку амерыканскіх войскаў. Амбасада ЗША ў Чэхіі на днях дзякавала чэхам за падтрымку праезду калоны.
Войскі ЗША знаходзіліся ў Польшчы і краінах Балтыі на вучэннях, якія былі выкліканыя значным нарошчваннем ваеннай актыўнасці Расеі ў рэгіёне.
Фота з архіву