Жыхара Берасця абвінавачваюць у паклёпе на Лукашэнку

У Беларусі можа з'явіцца яшчэ адзін палітвязень.

Міхаіл Лукашэвіч з Берасця больш за 10 гадоў вёў спецыфічны палітычны блог на сваім плоце. Увесь гэты час гарадскія ўлады шукалі магчымасць спыніць непакорлівага. Следчы камітэт распачаў супраць яго крымінальную справу за «паклёп на прэзідэнта» (частка 1 артыкула 367 Крымінальнага кодэкса Рэспублікі Беларусь), паведамляе тэлеканал «Белсат».

На плоце і сценах гаража каля свайго дома на вуліцы Ясеніна ў Берасці мужчына размясціў палітычныя лозунгі, свае разважанні пра ўладу, народ, карупцыю і нават зварот да Аляксандра Лукашэнкі.

Блог на плоце мужчына вёў больш за дзесяць гадоў - увесь гэты час прадстаўнікі ўлады шукалі шляхі, каб прымусіць Лукашэвіча зняць крамольныя надпісы. І, здаецца, знайшлі - у канцы мінулага года Следчы камітэт пачаў паводле факту надпісаў на плоце праверку, а пасля пастанавіў, што ў дзеяннях Лукашэвіча ёсць склад злачынства «Выказванні крытычнага характару, выяўленыя ў форме паклёпу ў дачыненні да ўладаў, сілавых структур і прэзідэнта». 29 снежня 2014 была распачатая крымінальная справа, паводле якой мужчыну пагражае да пяці гадоў турмы.

Сам Лукашэвіч ад удзелу ў следчых дзеяннях адмаўляецца, за што аднойчы ўжо затрымліваўся і правёў пэўны час пад вартай. У доме берасцейца правялі ператрус і канфіскавалі фарбу і сем пэндзлікаў. Цяпер Лукашэвіч хаваецца ад журналістаў, на тэлефонныя званкі не адказвае, дзверы не адчыняе. Але мужчына паспеў звярнуцца да праваабаронцаў.

«Лукашэвіч звярнуўся да нас па дапамогу, але ў следчых дзеяннях ён не ўдзельнічае, таму шмат чаго мы не ведаем. Улады даўно шукалі сродак, як прыбраць гэтыя надпісы з плота, але доўгі час не знаходзілі. Цяпер жа набліжаюцца прэзідэнцкія выбары. І гэта для ўладаў добрая нагода. Думаю, наўрад ці Лукашэвіча будуць судзіць паводле артыкула 367 Крымінальнага кодэкса, хутчэй за ўсё правядуць псіхіятрычную экспертызу, прызнаюць Лукашэвіча вар’ятам і адправяць на прымусовае лячэнне тэрмінам на два гады», - распавёў праваабаронца Уладзімір Малей.

Праваабаронцы адзначаюць, што ў апошнія месяцы ўлады Беларусі ўзмацнілі рэпрэсіі супраць апазіцыі, журналістаў і прадпрымальнікаў. З'явіліся новыя палітвязні, пачасціліся прэвентыўныя арышты грамадскіх актывістаў, прынятыя шэраг новых рэпрэсіўных законаў у дачыненні да СМІ, удзел блакаванне незалежных сайтаў, узмацніўся ціск на дробны бізнэс. Эксперты звязваюць узмацненне рэпрэсій з тым, што многія еўрапейскія чыноўнікі закрываюць вочы на парушэнні правоў чалавека ў Беларусі і спрабуюць наладзіць «дыялог» з дыктатарам.