Пілоты «Белавія» не будуць заставацца ў кабіне адны

Беларускія паветраныя рэйсы ўжо працуюць паводле «правіла двух асоб» з 2014 года.

Пра гэта заявіў намеснік генеральнага дырэктара маркетынгу і замежнаэканамічнай дзейнасці Ігар Чаргінец, піша БелТА.

«Тыя нормы, якія цяпер уводзяцца ў некаторых авіякампаніях свету, у «Белавія» дзейнічаюць досыць даўно. Напрыклад, у той час, калі кабіну пакідае адзін з двух пілотаў, там абавязкова знаходзіцца бортправаднік», - сказаў Чаргінец. Ён таксама адзначыў, што такая норма ўвайшла ў правілы, зацверджаныя яшчэ ў 2014 годзе.

Ігар Чаргінец звярнуў увагу, што ў авіякампаніі «вельмі ўважліва падыходзяць да падбору лётнага персаналу, а таксама выконваецца далейшы кантроль за фізічным і псіхічным здароўем пілотаў».

Нагадаем, адна з асноўных версій, якую цяпер разглядае следства - да катастрофы прывялі наўмысныя дзеянні другога пілота Андрэаса Любітца, які агульнай працягласцю блізу паўтара года праходзіў лячэнне ў псіхіятра.

Як паведаміў пракурор Марсэля Брыс Рабэн, запіс з чорнай скрыні паказвае на тое, што катастрофа А320 на поўдні Францыі стала вынікам наўмысных дзеянняў другога пілота - 28-гадовага грамадзяніна Нямеччыны Андрэаса Любітца. Як мяркуюць следчыя, другі пілот замкнуў кабіну, каб не пусціць назад камандзіра экіпажа, які выйшаў, і пачаў зніжэнне, пасля чаго самалёт урэзаўся ў гару.

Пасажырскі самалёт A320, які рухаўся з Барселоны ў Дзюсэльдорф, разбіўся 24 сакавіка на паўднёвым усходзе Францыі. Катастрофа адбылася ў раёне горнага масіва Труа-Эвешэ ў дэпартаменце Альпы Верхняга Праванса, каля мястэчка Дзінь-ле-Бэн.

На борце лайнера знаходзіліся 150 чалавек: 144 пасажыры і шэсць сябраў экіпажа.