Прэзідэнт Польшчы ўпершыню выступіць у Вярхоўнай Радзе Украіны
- 31.03.2015, 16:13
- 6,677
Падчас запланаванага на 8-9 красавіка афіцыйнага візіту ва Украіну прэзідэнт Польшчы Браніслаў Камароўскі выступіць на пасяджэнні парламента.
Пра гэта паведаміў міністр у канцылярыі прэзідэнта Ярамір Сакалоўскі, паведамляе Polskie radio.
8 красавіка ў Кіеве Камароўскі сустрэнецца з прэзідэнтам Украіны Пятром Парашэнкам.
«На наступны дзень прэзідэнт, як першы польскі прэзідэнт у гісторыі, зробіць прамову перад украінскім парламентам», - сказаў Сакалоўскі.
Гэта будзе першы ў гісторыі выступ польскага прэзідэнта ва ўкраінскім парламенце.
Нагадаем, у снежні 2014 года ў польскім парламенце выступаў Парашэнка.
У сваёй прамове перад польскімі сенатарамі і дэпутатамі ўкраінскі прэзідэнт, сярод іншага, падзякаваў палякам за тое, што застаюцца з украінцамі ў самыя складаныя моманты сучаснай гісторыі Украіны і яе народа.
Нагадаем, Камароўскі нядаўна заявіў, што падчас візіту ва Украіну і ў сувязі з 75-й гадавінай Катынскага злачынства ён наведае польскія вайсковыя могілкі ў Быкоўні, якія былі адкрытыя ў 2012 годзе і дзе спачывае амаль 3500 польскіх ахвяр трагедыі.