Менскім вуліцам вернуць гістарычныя назвы
13- 31.03.2015, 20:20
- 16,232
Менгарвыканкам ухваліў прапанову размясціць на цэнтральных вуліцах сталіцы дадатковыя шыльды з гістарычнымі назвамі.
Гаворка ідзе пра 16 вуліц, дзве плошчы, два праспекты. Усе яны размешчаны паблізу Высокага места, Нямігі, плошчы Незалежнасці, стадыёна Дынама, Ракаўскага і Траецкага прадмесцяў.
Гэта стала вынікам звароту ў Менгарвыканкам грамадскага аб'яднання «Альтэрнатыва».
Намеснік старшыні Менгарвыканкама Андрэй Дамарацкі ў пісьмовым адказе на зварот актывістаў паведаміў, што прапанова перададуць у камісію наймення і перайменавання праспектаў, вуліц, плошчаў Менска на найбліжэйшым пасяджэнні. З падтрымкай праекта выступіў і намеснік міністра культуры Аляксандр Яцко.
У каментары «Еўрарадыё» кіраўнік «Альтэрнатывы» Алег Корбан кажа, што на дублявальных шыльдах змесцяць усе вядомыя гістарычныя назвы вуліцы.
«У храналагічным парадку з таго стагоддзя, з якога вядома. Напрыклад, вуліца Карла Маркса адну з першых назваў мела вуліца Падгорная, потым - Новы Рынак, а ўжо за савецкім часам - Свярдлова. А за савецкай уладай і дагэтуль гэта вуліца Карла Маркса», - сказаў ён.
Корбан спадзяецца, што шыльды з гістарычнымі назвамі вуліц з'явяцца ўжо сёлета, у найлепшым выпадку - да лета.