Матч «Гомель» - «Юнацтва» стаў другім па працягласці ў гісторыі хакея
2- 8.03.2015, 13:59
- 10,677
7 сакавіка ў экстралізе чэмпіянату Беларусі ў хакеі пачаліся паўфінальныя серыі.
Пераможца рэгулярнага першынства салігорскі «Шахцёр» выйграў дома ў гарадзенскага «Нёмана» - 3: 2 (2: 1, 1: 1, 0: 0), піша БелаПАН.
«Гомель» саступіў на сваёй пляцоўцы менскаму «Юнацтву» ў шостым авертайме - 1: 2 (0: 0, 0: 1, 1: 0, 0: 0, 0: 0, 0: 0, 0: 0, 0: 0 , 0: 1). Працягласць матчу, які пачаўся ў 17 гадзін і скончыўся незадоўга да поўначы, склала 165 хвілін 11 секунд чыстага часу - другі паказчык у свеце.
Рэкорд працягласці хакейнага матчу быў усталяваны ў 1936 годзе ў паўфінале Кубка Стэнлі «Дэтройт» - «Манрэаль» (176 хвілін 30 секунд).
8 сакавіка спаборнікі сустрэнуцца зноў. Серыі праводзяцца да чатырох перамог адной з каманд.