Журналістку не пусцілі на суд паводле яе справы

Незалежная журналістка Тамара Шчапёткіна была выклікана ў суд Ленінскага раёна Берасця смскай.

Паведамленне журналістка ўбачыла толькі напярэдадні вечарам, але разам з адвакатам наважыла ў суд з'явіцца, піша сайт ПЦ «Вясна».

У судзе павінен быў адбыцца разгляд адміністрацыйнай справы паводле абвінавачвання Тамары Шчапёткінай у супрацоўніцтве з замежным СМІ («Радыё Рацыя») без акрэдытацыі. Пры складанні пратаколу адміністрацыйнага правапарушэння яна не прысутнічала. На першым судовым працэсе пратакол быў адпраўлены на дапрацоўку. Пры дапрацоўцы Шчапёткіна зноў не прысутнічала.

Журналістка прыехала ў суд за 40 хвілін да прызначанага часу, чаму ёсць сведкі. А 9.10 з суда таксама патэлефанавалі да адваката журналісткі і пацікавіліся, ці будуць яны са Шчапёткінай пры разглядзе справы. Тым не менш справа была разгледжаная суддзём Аляксандрам Семенчуком у адсутнасць журналісткі і яе абаронцы, пры гэтым аб прынятай пастанове суддзя адмовіўся паведаміць і адвакату, і самой журналістцы. Аб адмове ў правасуддзі Шчапёткіна напісала ў кнізе скаргаў і прапаноў на імя старшыні суда Пятра Баброўскага.

У пратаколе адміністрацыйнага правапарушэння паказвалася, што 8 студзеня 2015 г Шчапёткіна, не маючы акрэдытацыі ў якасці журналіста на тэрыторыі Беларусі, знаходзячыся ля дома 411 на вул. Чырвонагвардзейская ў г. Берасце, узяла інтэрв'ю ў супрацоўніка міліцыі ДПС АДАІ Берасцейскага РАУС Сяргея Неліповіча. Інтэрв'ю было размешчанае ў сетцы Інтэрнэт на сайце польскай радыёстанцыі «Радыё Рацыя». Згодна з пратаколам, Т. Шчапёткіна парушыла патрабаванні ч.4 арт. 35 і 36 Закона РБ «Аб сродках масавай інфармацыі», чым учыніла правапарушэнне згодна з арт. 22.9 КаАП (незаконны выраб прадукцыі сродкаў масавай інфармацыі).

Са слоў Тамары Шчапёткінай, 8 студзеня ніякага інтэрв'ю ў Неліповіча яна не брала і наогул на сайце «Радыё Рацыя» не было інтэрв'ю з Неліповічам: ні Шчапёткінай, ні кагосьці іншага.