Пад амністыю могуць трапіць 8 тысяч чалавек
10- 2.04.2015, 11:10
- 10,511
Сёлета ў Беларусі могуць быць амніставаныя блізу васьмі тысяч грамадзян.
Пра гэта паведаміў 2 красавіка журналістам міністр унутраных спраў Ігар Шуневіч.
«Пад дзеянне закона падпадуць традыцыйныя катэгорыі па ўзросце, асобам, здароўю. Нічога асаблівага ў законе не будзе, нічога адрознага ад папярэдняга», - сказаў ён.
Са слоў кіраўніка МУС, праект закона практычна гатовы і праходзіць узгадненне ў зацікаўленых органах. Шуневіч разлічвае, што ў канцы красавіка - пачатку траўня дакумент будзе ўнесены на разгляд «дэпутатаў» «палаты прадстаўнікоў», інфармуе БелаПАН.
Як паведамлялася раней, законапраект аб амністыі з нагоды 70-годдзя Перамогі ў Вялікай Айчыннай вайне плануюць перадаць у парламент да 16 красавіка. Пра гэта заяўлялі начальнік дэпартамента выканання пакаранняў МУС Сяргей Дарошка і начальнік аддзела ў наглядзе за законнасцю выканання крымінальных пакаранняў Генпракуратуры Юрый Гарошка 24 сакавіка падчас жывой тэлефоннай лініі ў «СБ. Беларусь сегодня».
Са слоў Гарошкі, амніставанне можа закрануць і асуджаных паводле першых двух частках артыкула аб незаконным абароце наркотыкаў (арт. 328 КК). Але, агулам, дадаў ён, асуджаныя паводле артыкулаў пра наркотыкі наўрад ці могуць разлічваць на гуманнасць дзяржавы.