Сяргей Касціцын: Вельмі рады пабачыцца з хлопцамі і сваім братам

Нападнік нацыянальнай каманды Беларусі падзяліўся меркаваннем аб галоўным трэнеры каманды Дэйве Льюісе.

Сяргей Касціцын адказаў на пытанні выдання «Спартыўная панарама».

- У якім настроі прыбылі ў нацыянальную каманду і як ацэньваеце сваю форму?

- Усё выдатна. З формай праблем няма. Хоць і не ўдалося выйсці на лёд у фінале Кубка Гагарына, аднак я стала трэніраваўся і добра сябе адчуваю. Вельмі рады пабачыцца з хлопцамі і сваім братам.

- Рады, што Дэйв Льюіс вас аб'яднаў з братам у адно звяно?

- У прынцыпе, мы і летась павінны былі з ім разам гуляць. Аднак не далі магчымасці то траўмы, то дыскваліфікацыя. Паглядзім, як будзе цяпер. Хацелася б, вядома.

- З Калюжным паспееце наладзіць паразуменне?

- Мы з Аляксеем яшчэ і на Алімпіядзе гулялі разам. Добра ведаем адзін аднаго. Няма ніякіх праблем.

- Як працуецца пад кіраўніцтвам Дэйва Льюіса? Чым адрозніваюцца ягоныя метады працы і іншых трэнераў?

- У кожнага настаўніка сваё бачанне працэсу і свае нюансы заняткаў. Першае ўражанне станоўчае. Вельмі дасведчаны спецыяліст. Такія людзі патрэбныя нашаму хакею.