Лукашэнка пра крэдыт МВФ: Нам бы хапіла і $2 мільярдаў

Беларусь вядзе інтэнсіўныя перамовы з Міжнародным валютным фондам (МВФ) аб магчымай новай праграме.

Пра гэта Аляксандр Лукашэнка заявіў у інтэрв'ю медыяхолдынгу Bloomberg, тэлеверсію якога паказаў тэлеканал «Беларусь 1» увечары 2 красавіка, піша tut.by.

«Мы інтэнсіўна сёння вядзем перамовы з МВФ аб тым, каб выйсці на новую праграму. Яны гатовыя з намі весці дыялог у фармаванні новай праграмы. Але гэта не галоўная наша мэта - лезці ў запазычанасць. Перад новым урадам пастаўлена жорсткая задача: хопіць запазычанасцяў. У нас ёсць магчымасць, хай складана, але давайце разлічымся з гэтымі абавязкамі, і больш браць пазыкаў не трэба», - падкрэсліў дыктатар.

Са слоў Лукашэнкі, ужо адбыліся «дзве ці тры сустрэчы» з прадстаўнікамі МВФ наконт магчымай новай праграмы: «Мы пакуль пра канкрэтныя лічбы не вялі размову, але пры нашых выплатах сёлета, 2,5 мільярда нам бы хапіла і 2 мільярды. То бок, гэта невялікая сума».

«Мы абсалютна гатовыя на рэформы, тым больш ўсе міжнародныя агенцтвы сведчаць, што мы рэфармуем, мы ўвесь час рухаемся ў гэтым кірунку. І тое, што ад нас патрабуе МВФ, гэта не навіна, гэта абсалютна правільна. Але толькі гэта трэба рабіць своечасова і з выгадай для дзяржавы. Калі гэта нам будзе выгадна і калі гэта ў пару, тыя ці іншыя рэформы, мы іх зробім неадкладна. Нават без МВФ», - адзначыў Лукашэнка.

З яго слоў, галоўнае, каб «гэтыя патрабаванні ці прапановы МВФ не былі палітызаваныя, гэта недапушчальна».

МВФ патрабуе наўзамен ад Менска правядзення рашучых структурных рэформаў і пераарыентацыі на рынкавую эканоміку. Новая праграма, у прыватнасці, павінна ўключаць лібералізацыю коштаў, план хуткага павышэння коштаў на ЖКГ і транспарт да ўзроўню поўнага пакрыцця, ліквідацыю абавязковых мэтавых паказчыкаў для прадпрыемстваў, а таксама якія ўнушаюць давер планы ў прыватызацыі ў карпаратыўным і банкаўскім сектарах.