ДТЗ у цэнтры Менска: Subaru вылецеў на тратуар і знёс святлафор

Сур'ёзная аварыя адбылася на скрыжаванні праспекта Машэрава і вуліцы Куйбышава.

Сутыкнуліся Hyundai і Subaru. Прычым апошні аўтамабіль пасля ўдару знёс слуп і перакуліўся на дах. На месца здарэння выязджалі некалькі аўтамабіляў хуткай дапамогі, аднак шпіталізацыя нікому не спатрэбілася, паведамілі onliner.by ў ДАІ.

Са слоў удзельніка нашага форуму Alex-R, дзяўчына паварочвала налева, а хлопец на Subaru ехаў проста з Машэрава ў першым шэрагу. Апошні аўтамабіль у выніку ўдару перакуліўся.

Інспектары агулам пацвердзілі гэтыя словы: «Subaru, кіраваны мужчынам (1982 г. н.), рухаўся па праспекце Машэрава (з боку «Белай вежы» ў кірунку праспекта Незалежнасці). Насустрач ехаў Hyundai, за стырном якога знаходзілася дзяўчына (1993 г. н.). Паводле папярэдніх звестак, яна рабіла паварот налева. Адбылося сутыкненне, якое прывяло да такіх наступстваў».

Паводле версіі аднаго з бакоў, Subaru рухаўся на чырвоны сігнал святлафора. Аднак гэтыя словы яшчэ будуць правярацца: на скрыжаванні ўсталяваныя камеры, запіс будзе разгледжаны, і толькі тады стане вядома, як было напраўду.

Ад шпіталізацыі абодва ўдзельнікі ДТЗ адмовіліся. Аднак было відаць, што дзяўчына накульгвае - яна не магла рухацца без старонняй дапамогі.

Інспектары падкрэслілі, што абодва ўдзельнікі ДТЗ цвярозыя, у іх дзейныя пасведчанні кіроўцаў. Паводле факта, які адбыўся, вядзецца разбіранне.

Фота: auto.onliner.by