Жыхара Берасця, якога абвінавачваюць у паклёпе на Лукашэнку, адправілі ў «Навінкі»

Паводле інфармацыі праваабаронцаў, Міхаіл Лукашэвіч праходзіць там псіхіятрычную экспертызу.

Берасцейца, які абвінавачваецца ў паклёпе на Аляксандра Лукашэнку, адправілі ў «Навінкі» на псіхіятрычную экспертызу. Пра яго знаходжанне ў Рэспубліканскім навукова-практычным цэнтры псіхічнага здароўя «Еврорадио» паведаміў праваабаронца Уладзімір Вялічкін.

З яго слоў, блізу тыдня ён не мог звязацца з Міхаілам Лукашэвічам. Тады ён звярнуўся да следчых, якія займаюцца справай берасцейца. Падчас тэлефоннай размовы і стала вядома месцазнаходжанне мужчыны.

Нагадаем, што крымінальную справу ў дачыненні да Міхаіла Лукашэвіча распачалі ў снежні 2014 года. Нагодай сталі самаробныя транспаранты, з якіх 63-гадовы жыхар Берасця даслоўна пабудаваў плот у сваім доме. Яны ўтрымлівалі крытыку як дзеючай, так і былой савецкай улады. У некаторых надпісах згадвалася прозвішча Лукашэнкі.

«Нягледзячы на тое, што ён замаляваў абразлівыя, на думку следства, выказванні, яго адправілі на абследаванне ў «Навінкі». Следчы кажа, што ён добраахвотна туды паехаў. Спадзяюся, што гэта сапраўды так, але здзіўляе, што ён не паведаміў пра гэта», - распавядае Вялічкін.

Лёс Лукашэвіча вызначыцца паводле вынікаў экспертызы. За паклёп на кіраўніка дзяржавы можа пагражаць да 4 гадоў пазбаўлення волі. У выпадку, калі мужчыну прызнаюць псіхічна хворым, яго чакае перспектыва ізаляцыі ад грамадства і прымусовае лячэнне тэрмінам да 2 гадоў.