Вярхоўны суд распачаў справу аб банкруцтве "Дэльта Банка"

У дачыненні да ЗАТ "Дэльта Банк" будзе адкрыты конкурс.

Такая пастанова змяшчаецца ў вызначэнні, вынесеным сёння паводле вынікаў пасяджэння калегіі ў эканамічных справах Вярхоўнага суда, паведамілі БелТА ў прэс-службе суда.

У дачыненні да закрытага акцыянернага таварыства будзе адкрыты конкурс. Кiраўнiком у справе аб банкруцтве банка прызначаная дзяржаўная ўстанова "Агенцтва па гарантаванай кампенсацыі банкаўскіх ашчадкаў (дэпазітаў) фізічных асоб". Упраўляючаму ў справе аб банкруцтве ЗАТ "Дэльта Банк" даручана забяспечыць неадкладнае прыняцце спраў банка.

Паводле вынікаў аналізу фінансава-гаспадарчага стану ЗАТ "Дэльта Банк" было ўстаноўлена, што сума яго актываў недастатковая, каб разлічыцца з больш як 3 тысячамі крэдытораў. Паводле стану бухгалтарскага балансу банка на раніцу 18 траўня ўласны капітал склаў мінус Br313 млрд.

У сваю чаргу абавязанні перад фізічнымі асобамі былі выкананыя Агенцтвам па гарантаванай кампенсацыі банкаўскіх укладаў. Людзям ужо выплацілі $52.4 млн, 8,6 млн еўраў і Br740,2 млрд. Засталіся грошы толькі тых грамадзян, якія не звярнуліся па кампенсацыю ці не забралі свае сродкі.

З 12 сакавіка ў ЗАТ "Дэльта Банк" пастановай праўлення Нацыянальнага банка была ўведзеная часовая адміністрацыя ў кіраванні банкам. На перыяд яе дзеяння паўнамоцтвы праўлення ЗАТ былі прыпыненыя. Захады ўжытыя на падставе аналізу паказчыкаў існай дзейнасці беларускага "Дэльта Банка" на фоне негатыўных падзей, якія адбываюцца ў АТ "Дэльта Банк" (Украіна), у тым ліку звязаных з прызнаннем яго неплацежаздольным.

Нацыянальны банк з 18 сакавіка адклікаў ліцэнзію ЗАТ "Дэльта Банк" на вядзенне банкаўскай дзейнасці. Такую пастанову Нацбанк прыняў паводле вынікаў разгляду інфармацыі, атрыманай ад часовай адміністрацыі кіравання ЗАТ "Дэльта Банк", у сувязі з невыкананнем ім асобных ліцэнзійных патрабаванняў, а таксама стварэннем фінансавага становішча, якое пацягнула невыкананне банкам сваіх абавязанняў перад укладчыкамі і іншымі крэдыторамі.