ІП і кампаніям не вернуць грошы з рахункаў у «Дэльта Банку»?

Пачынаючы з учорашняга дня юрыдычныя асобы ўжо могуць звяртацца ў банк з патрабаваннем аб вяртанні сваіх сродкаў.

Нацбанк адклікаў ліцэнзію ў «Дэльта Банка» яшчэ ў сярэдзіне сакавіка. З тых часоў Агенцтва гарантаванай кампенсацыі банкаўскіх дэпазітаў фізічных асоб практычна цалкам разлічылася з тымі беларусамі, якія захоўвалі грошы на яго ўкладах і рахунках, выплаціўшы ім 52,4 мільёна даляраў, 8,6 мільёна еўраў і 740,4 мільярда беларускіх рублёў.

Цяпер звяртацца ў банк з патрабаваннем аб вяртанні грошай могуць і юрыдычныя асобы, якія захоўвалі ў ім сродкі. Звязана гэта з тым, што суд распачаў крымінальную справу аб банкруцтве Дэльта Банка. Ягоныя крэдыторы (гэта значыць тыя, каму банк павінен грошы) могуць альбо адправіць свае патрабаванні ў пісьмовым выглядзе па паштовым адрасе Дэльта Банка, альбо асабіста прыйсці ў цэнтр банкаўскіх паслуг у галаўным офісе. Форму заявы можна спампаваць на сайце Дэльта Банка, піша «Комсомольская правда в Беларуси».

Праўда, гэта не азначае, што грошы ўсім бізнэсоўцам вернуць цалкам. Дзяржава гарантуе захаванасць укладаў фізічных асоб, а вось юрыдычных - не. Зараз паводле закону банк у першую чаргу абавязаны будзе цалкам разлічыцца з усімі сваімі супрацоўнікамі, выплаціць за іх унёскі ў Фонд сацыяльнай абароны насельніцтва, пералічыць у бюджэт усе належныя падаткі. І толькі потым надыдзе чарга юрыдычных асоб і прадпрымальнікаў. Але ці дойдзе да іх чарга ў прынцыпе? Нядаўна стала вядома, што ў 2012 - 2014 гадах Дэльта Банк перавёў у еўрапейскія банкі 35 мільёнаў даляраў. З гэтых грошай меркавалася вяртаць грошы ўкладчыкам, аднак яны апынуліся на рахунках невядомай кампаніі ў Белізе. Паводле звестак на 18 траўня, Дэльта Банк і зусім сышоў у мінус на 313 мільярдаў рублёў.

- Гэта азначае, што абавязанняў у банка значна больш, чым актываў, - тлумачыць Вадзім Іосуб, старэйшы аналітык Альпары. - У сітуацыі, якая склалася можа апынуцца, што на цяперашні момант у банка няма ўвогуле ніякіх грошай, і адзіная маёмасць, на якую могуць разлічваць крэдыторы, - гэта мэбля, кампутары, будынкі, калі яны былі ў яго ва ўласнасці. Банк можа паспрабаваць іх прадаць, каб разлічыцца з абавязкамі. Адпаведна, калі грошай на задавальненне ўсіх прэтэнзій не хопіць, то яны будуць задаволены часткова: тыя, што засталіся пасля абавязковых плацяжоў сродкі размяркуюць паміж кліентамі банка. Не выключана, што юрыдычныя асобы і прадпрымальнікі не атрымаюць нічога. Калі знойдуць вінаватых у банкруцтве банка, з іх можна будзе спагнаць грошы ў судовым парадку, але магчымасць гэтая чыста тэарэтычная.