Украінскі гамбіт ЗША і Расеі

ЗША маюць патрэбу ў новай стратэгіі ў дачыненні да Крамля.

Шматлікія амерыканскія экспэрты прызнаюць, што агрэсіўная знешняя палітыка Крамля заспела кіраўніцтва ЗША знянацку. Якія змены павінны быць унесеныя ў міжнародную стратэгію Злучаных Штатаў і ў стасунках Вашынгтона з Масквой?

Першыя 10-15 гадоў пасля развалу Савецкага Саюза Захад, і, у першую чаргу, Амерыка разглядалі Расейскую Федэрацыю як маладую дэмакратыю, якой трэба дапамагчы інтэгравацца ў сусветную супольнасць. Аднак падзеі апошніх двух гадоў паказалі: Расея не толькі праводзіць уласную міжнародную палітыку, але і канкуруе са Злучанымі Штатамі за сферы ўплыву. Прынятыя раней устаноўкі Вашынгтона ў дачыненні да Крамля, адзначаюць палітолагі ў ЗША, састарэлі, і сёння ўжо неактуальныя, паведамляе «Голос Америки».

«Мы павінны разумець, наколькі рэалістычныя нашы стратэгічныя мэты, і якім чынам мы іх дасягаем. Бо часам гэтыя мэты супярэчаць адна адной, а часам з'яўляюцца і ўзаемавыключальнымі, - кажа Эндру Качынс, дырэктар расейска-еўразійскіх праграм CSIS. - Таму трэба думаць і пра тое, якія павінны быць прыярытэты ў дасягненні пастаўленых мэтаў. На жаль, у дакументах, якія вызначаюць стратэгію ЗША, мы гэтага пакуль не бачым».

Спецыялісты з Вайсковага каледжа войска ЗША, а таксама палітолагі і прафесары вядучых даследчых інстытутаў правялі дэталёвы аналіз расейскай дзяржаўнай палітыкі. На графіцы гэтая сістэма была намаляваная ў выглядзе традыцыйнага сімвала - мядзведзя. Але змагары новай стратэгіі ў дачыненні да Крамля як раз і крытыкуюць звыклыя шаблоны. Пуцінская Расея, сцвярджаюць яны, гэта - не Савецкі Саюз, і стасункі з ёй - гэта не «халодная вайна», а новая рэальнасць 21-га стагоддзя.

«Не, мы не ўважаем, што наступіла новая «халодная вайна», - тлумачыць Джэймс Макнотан, прафесар цэнтра ваеннай гісторыі пры войску ЗША. - Гісторыя заўсёды рухаецца наперад, а не назад. Нам проста трэба цвяроза ацэньваць сітуацыю з розных пазіцый: з пазіцыі Крамля, з пазіцыі афіцыйнага Кіева, уладаў ЗША і, вядома, усіх еўрапейскіх дзяржаў. Гэтую ацэнку варта выпрацаваць з прыкладнога пункту гледжання, каб Еўропа заставалася вольнай, мірнай і палітычна цэласнай».

Нават калі рэжым Пуціна не збіраецца развязваць новую «халодную вайну» з Амерыкай, кажуць аналітыкі, яго дзеянні - гэта спроба вярнуць Расеі, хаця б у вачах уласных грамадзян, імідж вялікай дзяржавы, як адзін са спосабаў захаваць уладу. Але такія ўстаноўкі багатыя новымі міжнароднымі канфліктамі.

Перад прэзідэнцкімі выбарамі 2018-га года, сказана ў дакладзе экспэртаў, Пуціну спатрэбіцца прадэманстраваць народу нейкія поспехі палітычнага характару. У сувязі з гэтым, на ўсходніх межах Расеі з боку Крамля не выключаны - цытата - больш агрэсіўныя аперацыі сакрэтнага характару з прыцягненнем разведкі і спецслужбаў.

Сярод прапанаваных аналітыкамі варыянтаў супрацьстаяння крамлёўскім амбіцыям: наданне Украіне і Грузіі статусу стратэгічных партнёраў, няхай якія і не ўваходзяць у NATO, а ў выпадку эскалацыі - і размяшчэнне амерыканскіх войскаў на іх тэрыторыі. Адна з удзельніц праекту, падпалкоўнік войска ЗША Кэрэн Брыгман, прама назвала прэзідэнта Пуціна «параноікам, які гуляе з Амерыкай у шахматы». Калі гэта так, то задача амерыканцаў - перахапіць ініцыятыву ў гэтай партыі і паставіць Крэмль у ролю гульца, які не паспявае рэагаваць на дзеянні апанента. Пытанне толькі ў тым, як пры гэтым пазбегнуць эскалацыі напружання.