Le Figaro: Расейскія рабочыя страйкуюць праз затрымкі заробкаў

У краіне, дзе адсутнічае сацыяльны дыялог, у работнікаў застаюцца толькі страйкі, каб захаваць умовы працы або проста атрымліваць заробак.

Аб гэтым піша П'ер Аўрыль у артыкуле, апублікаваным у газеце Le Figaro (пераклад - Инопресса.ру).

Касмадром "Усходні" - сімвалічная будоўля для эры Пуціна. Гэты праект цяпер паралізаваны страйкавым рухам: 500 наёмных рабочых з субпадрадных арганізацый ТМК, якія не атрымліваюць заробак са студзеня, пакінулі працоўныя месцы і вярнуліся дадому. "Адразу ж пасля гэтага дырэкцыя наважыла наняць 1000 новых рабочых, як быццам нічога не адбылося. Гаворка ідзе пра абразу нашага прафесіяналізму", - кажа начальнік участка Антон Цюрышаў. Адбыўся вельмі моцны скандал, яго рэха дакацілася да кіраўніка Крамля.

Дзяржава, ва ўсякім выпадку, робіць усё магчымае, каб не дапусціць пажару. Афіцыйна ўступіўшая ў рэцэсію ў першым квартале, расейская эканоміка адчувае на сабе незадаволенасць ахвяр крызісу, якія больш не раздумваюць і пераходзяць да страйкаў. Расце спіс прадпрыемстваў і адміністрацый, дзе працяглы час не выплачваюць заробкі. "Гэты пратэстны рух назіраецца цягам шасці месяцаў ва ўсіх сектарах, асабліва ў сферы аховы здароўя і адукацыі, дзе праводзяцца масавыя скарачэнні", - адзначае Барыс Краўчанка, прэзідэнт агульнарасейскага аб'яднання прафзвязаў "Канфедэрацыя працы Расеі".

У гэтай краіне, дзе няма сацыяльнага дыялогу, "кожны актывіст адчувае пагрозу судовага пераследу", адзначае Барыс Краўчанка. Працоўнае заканадаўства, якое зазнала ўзмацненне жорсткасці ў 2000 годзе "робіць практычна немагчымай арганізацыю страйку", кажа прафзвязавы лідар. Пасля стварэння прафзвязу ў сваёй маскоўскай паліклініцы тэрапеўт Ганна Землянухіна была выкліканая да галоўнага лекара для асабістай гутаркі, якая доўжылася 4 гадзіны. Яе абвінавачвалі ў сабатажы і падрыве бяспекі краіны ў інтарэсах алігархаў і выведслужбаў. Пілот, чалец прафзвязу аэрапорта "Шарамеццева" адбыў у турме 6,5 гадоў паводле абвінавачвання ў "карупцыі". Кіраўнік прафзвязу докераў у Прымор'і быў асуджаны на 3,5 года зняволення за "крадзеж", піша карэспандэнт.

Але, нягледзячы на пагрозы і запалохванні, некаторыя пратэстоўцы ўсё ж дамагаюцца паляпшэння ўмоў працы. Ганна Землянухіна кажа, што ім вярнулі 12 хвілін на прыём пацыента замест 8 хвілін у адпаведнасці з праектам рэфармавання ўстаноў аховы здароўя. Была скарочаная і колькасць абавязковых дадатковых гадзін працы, гаворыцца ў артыкуле.