«Бульбаш-хол» стане «Банкет-холам»?

Рэстаранна-забаўляльны комплекс, пабудаваны побач з Курапатамі - месцам масавых расстрэлаў пад Менскам - рыхтуецца да адкрыцця.

Праверыць гэты факт на месцы няма магчымасці. Ахова забаўляльнага комплексу варожа ставіцца да журналістаў і адмаўляецца даваць каментары, паведамляе «Радыё Свабода».

Пакуль не атрымоўваецца высветліць тэрміны магчымага адкрыцця і ў дзяржаўных структурах, і ў адміністрацыі самой установы.

Каб адкрыць рэстаран або іншы аб'ект гандлю або паслуг, уладальнік установы павінен прайсці рэгістрацыю ў гандлёвым рэестры. Гэтым займаюцца аддзелы гандлю мясцовых органаў улады, у выпадку «Бульбаш-хола» - гэта Менскі раённы выканаўчы камітэт. Пасля атрымання адпаведнай выпіскі, узгаднення парадку работы і атрымання ліцэнзіі пачынаецца праца ўстановы. Аднак з гэтымі пытаннямі ў аддзел гандлю Менскага райвыканкама гаспадары «Бульбаш-хола» не звярталіся, паведаміла загадчыца аддзела гандлю Алена Чыстова:

- Нічога не магу сказаць пра адкрыццё, да мяне прыходзяць, калі аб'ект цалкам падрыхтаваны да адкрыцця. На гэты момант да мяне ніхто яшчэ не прыходзіў. Два гады таму яны спрабавалі нешта развязаць, але і да гэтага часу пакуль нічога не развязанае.

- Ці звярталіся да вас ўладальнікі, каб змяніць назву «Бульбаш-хол», удакладніць нешта што да тэрыторыі?

- Два гады да мяне ніхто не звяртаўся наогул.

- Гэта значыць, фармальна як была заяўленая назва «Бульбаш-хол», так яна і застаецца?

- Так, так. Мяне самую цікавіць - чым гэта ўсё скончыцца.

Будоўля забаўляльнага комплексувыклікала абурэнне грамадскасці не толькі з прычыны яго непасрэднай блізкасці да пахаванняў мемарыяльнага ўрочышча Курапаты, але і праз назву «Бульбаш-хол», якая ўспрымаецца як абраза для беларусаў. Тады ж высветлілася, што чатыры дамы забаўляльнага комплексу ўзведзеныя незаконна, на тэрыторыі ахоўнай зоны Курапатаў. Генеральная пракуратура вынесла распараджэнне аб зносе пабудоў, але гаспадары ўстановы яго праігнаравалі. У лістападзе 2013 Навукова-метадычная рада пры Міністэрстве культуры Рэспублікі Беларусь паменшыла ахоўную зону Курапатаў да 50 метраў. Такім чынам чатыры незаконна збудаваныя дамы «Бульбаш-хола» апынуліся па-за ахоўнай зонай Курапатаў.

Які статус гэтай тэрыторыі і ці ўзаконенае будаўніцтва цяпер, таксама застаецца невядомым - намесніца загадчыка Управы па ахове гісторыка-культурнай спадчыны Міністэрства культуры Аксана Сматрэнка паведаміла, што не валодае інфармацыяй пра лёс яшчэ нядаўняй ахоўнай зоны Курапатаў.

Рэстаран «Бульбаш-хол» павінен увайсці ў сетку рэстаранаў пад назвай «Наша рэстаранная група». Адміністратарка рэстаран-клуба «Тусэ» ад імя кіраўніцтва паведаміла, што аб уласніках рэстарана, яго назвы і часу адкрыцця нічога паведаміць не можа. На афіцыйным сайце кампаніі «Наша рэстаранная група» паказана, што да адкрыцця рыхтуецца рэстаран «Банкет-хол». Гаспадары завуць цяпер «Бульбаш-хол» і хто яны самі, супрацоўнікі кампаніі паведаміць адмаўляюцца. Бухгалтар рэстарана «View», прынамсі, сказала:

- Магчыма, гэта будзе наш рэстаран, але пакуль не - нам яго яшчэ ніхто не перадаваў. Мы яго заказвалі, пад нас яго будавалі, але нам яго пакуль яшчэ ніхто не перадаваў. Калі будзе адкрыццё, не ведаю - я бухгалтар, атрымаю дакументы - буду афармляць адкрыццё. На гэты момант я не магу сказаць, калі гэта будзе - яго, напэўна, ужо тры гады адкрываюць. Аб адкрыцці пакуль ніхто і гаворкі не вядзе. І на якой там стадыі ўсё - мне таксама не патлумачылі.

- Хто ён, гэты ўладальнік? Беларус, расеец, які іншы бізнэсовец - да гэтага часу вялікая таямніца.

- Калі не хочуць раскрываць гэтую таямніцу, то пра яе і не варта гаварыць. Дакументаў на гэты конт у мяне няма, таму я вам нічым не дапамагу.

Тым часам грамадскія актывісты прадаўжаюць судовы працэс у справе абароны Курапатаў. Летась яны звярнуліся ў суд з пазовам да Міністэрства культуры, патрабуючы прыцягнуць да адказнасці чыноўнікаў за бяздзейнасць у справе выканання пастановы Генеральнай пракуратуры, якая запатрабавала ад гаспадароў «Бульбаш-хола» знесці чатыры дамы, незаконна збудаваныя ў ахоўнай зоне Курапатаў. Таксама грамадскія актывісты выступілі з адкрытым зваротам да забудоўнікаў - кампаній «Белрэстінвест» і «Еўрабуд», якія вядуць будаўнічыя работы вакол Курапатаў, з заклікам пакінуць захопленыя плошчы ахоўнай зоны Курапатаў. Заяўнікі паведамляюць, што гэты зварот адкрыты для падпісання ўсімі неабыякавымі грамадзянамі праз сацыяльныя сеткі ў інтэрнэце.