Шчоткіна мяркуе, што беларускі не хочуць быць хатнімі гаспадынямі

Міністр працы і сацыяльнай абароны заявіла, што жанчыны ў Беларусі на самой справе хочуць працаваць.

У сераду, 6 траўня, «дэпутаты» абмяркоўвалі Дэкрэт Лукашэнкі №3 «Аб папярэджанні сацыяльнага ўтрыманства». З дакладам Дэкрэта выступала міністр працы і сацыяльнай абароны Мар'яна Шчоткіна. Яна тлумачыла «дэпутатам» Дэкрэт і адказвала на іх пытанні. Адказала Мар'яна Шчоткіна і на пытанні журналіста «Еўрарадыё».

- Да прыкладу, муж добра зарабляе і таму жонка можа сабе дазволіць не працаваць. Згодна з гэтым Дэкрэтам яна павінна альбо ўладкавацца на працу, альбо заплаціць 20 базавых. Але муж плаціць падаткаў столькі, колькі 10 работнікаў якога-небудзь завода. І ён яшчэ павінен за жонку 20 базавых заплаціць - ці няма тут пэўнай несправядлівасці?

- А давайце па-іншаму паглядзім на гэта: мы гаворым, што кожны чалавек - гэта індывідуальнасць, кожны чалавек - асоба, у кожнага чалавека ёсць свае правы і свае абавязкі. Ну, калі ёй трэба будзе пайсці за бальнічным лістком - ён жа не пойдзе замест яе? Ну, я да прыкладу, калі яна працуе. Або, да прыкладу, выплаты нейкай дапамогі, на якія яна мае права паводле заканадаўства, на яе ж распаўсюджваюцца як на асобу, а не як на жонку, праўда? Таму тут кожная сям'я прымае сваю пастанову. І ведаеце, праводзілі даследаванне, і большасць жанчын хочуць рэалізоўвацца не толькі як хатнія гаспадыні. А хоць бы праз тую ж дыстанцыйную працу! Гэта можа быць і журналістыка, і фатаграфія. Выхадаў на самай справе сёння вельмі шмат - трэба толькі іх рэалізоўваць. Хай кожны адказвае за сябе!

- Добра, чалавек не працуе першую палову года, а потым уладкаваўся на працу. За гэтыя 6 месяцаў «дармаедства» ён усё роўна павінен дзяржаве заплаціць?

- Глядзіце, з 1 студзеня 2015 года ўваходзіць у дзеянне гэты дэкрэт. А выплачваць трэба ў лістападзе 2016 года. Былі прапановы ўвесці, да прыкладу, з 1 красавіка, але навошта 1 квартал губляць людзям, якія працавалі? Чалавек заўсёды можа падлічыць і паглядзець, што такое больш за 183 дзён, - арыфметыку ведаюць усе, і выбар за чалавекам. Але - год прайшоў, і ў лістападзе наступнага года выплата гэтага збору. На прыклад: чалавек здае кватэру і плаціць падатак. Калі падатак складае 20 базавых велічынь - ён нічога не даплачвае. Калі менш - даплачвае. Калі ён звяртаецца сам і кажа, што не ўдзельнічае ў фінансаванні, то, звярніце ўвагу, калі ён да 1 ліпеня выплачвае збор - зніжэнне на 10%. А гэта ўжо 18 базавых велічынь. Зноў-такі - кожны чалавек прымае пастанову сам.

- Вы згадалі пра «дыстанцыйную працу журналістам» - як у такой сітуацыі быць журналістам-фрылансерам?

- Не толькі журналісты-фрылансеры - усё фрылансеры павінны аформіцца якім-небудзь чынам. Галоўнае што? Выхад з ценю. Фрылансеры плацяць падаткі? Скажам шчыра - не. Ёсць яшчэ час на тое, каб развязаць гэтае пытанне і аформіцца або аформіць працу на рэдакцыю або кампанію належным чынам.

- Ці не думаеце, што выдаткі на выяўленне дармаедаў, спробы спагнаць з іх грошы, прыцягненне праз суд да адміністрацыйнай адказнасці і гэтак далей будуць большыя, чым у выніку з гэтых дармаедаў страсуць?

- Не адкрыю сакрэт, калі скажу, што гэтую базу падатковая будзе рабіць усё роўна, ў любым выпадку. Будзе яна яе рабіць сёлета ці ў наступным - усё роўна. Калі вы звярнулі ўвагу, цяпер падатковыя органы правяраюць даходы, выдаткі, адпаведнасць і гэтак далей. Таму гэтая база павінна ў іх быць усё роўна. Мы проста гэты працэс зрабілі больш хуткім і ссунулі па часе. Вось і ўсё!