Крызіс дабраўся да «Мілавіцы»

Галоўны акцыянер знакамітай беларускай фабрыкі нясе страты.

Апублікаваная справаздача за першы квартал 2015 эстонскай кампаніі Silvano Fashion Group, ядром якой з'яўляюцца фабрыка «Мілавіца» і шэраг іншых беларускіх прадпрыемстваў, сведчыць пра праблемы, якія ўзніклі ў холдынгу.

Продажы ўпалі ўдвая і на ўсіх рынках, а колькасць супрацоўнікаў скарацілася за тры месяцы амаль на 15%, піша «Заўтра тваёй краіны».

Аб'ём продажаў жаночай бялізны ад SFG у студзені-сакавіку гэтага года ў параўнанні з аналагічным перыядам мінулага года скараціўся на 51,8%. Калі летась у першым квартале продажу складалі 27,095 еўра, то сёлета - усяго 13, 073 млн. еўраў. Аптовыя продажы ўпалі на 58%, раздробленыя на - 21,4%.

Беларускі рынак паводле вынікаў першага квартала адрозніваецца ў лепшы бок на фоне астатніх. Дэвальвацыйныя чаканні мясцовых спажыўцоў паўплывалі на пакупніцкі попыт.

Доля Беларусі ў агульным аб'ёме продажаў холдынгу вырасла з 25,6% да 38,8%, а ў рублях падзенне склала ўсяго 4%. У еўрах гэты паказчык: мінус 26,7% (5 ,076 млн. еўраў) у параўнанні з першым кварталам 2014 (6,926 млн. еўраў). Але гэта ўсё роўна менш, чым на астатніх рынках.

У Расеі, напрыклад, выручка SFG у еўрах скарацілася на 62,1%, у Казахстане - на 34,6%, у краінах Балтыі - на 48,5%, у Малдове - на 43%, на астатніх рынках - на 28,4 %. Ва Украіне падзенне склала мінус 84,2% да першага кварталу 2014 года.

Упершыню за апошнія гады SFG зафіксаваная чыстая страта, якая склала для акцыянераў групы 521 000 еўраў.

Амаль на 15% з пачатку года зменшылася колькасць супрацоўнікаў холдынгу. На 31 снежня 2014 года ў SFG працавалі 2 749 чалавек. На 31 сакавіка 2015 г. - 2 346. У справаздачы не ўдакладняецца, за кошт якіх структурных адзінак адбылася аптымізацыя штата. Але беларускія СМІ паведамілі, што фабрыка «Мілавіца» вымушана перайсці на трохдзённы рэжым працы праз тое, што на складах назапасіліся чатырохмесячныя запасы прадукцыі.

Створанай у 2006 Silvano Fashion Group належыць 84,9% акцый «Мілавіцы». Холдынг таксама з'яўляецца ўласнікам 58,33% акцый маладзечанскай фабрыкі «Юнона» і 100% прадпрыемства «Джыміл». У структуру холдынгу ў Беларусі ўваходзіць аптова-раздробленая кампанія «Сільван Фэшн» (56 уласных і 8 франчайзінгавай крам) і лагістычны бізнэс «Балтспед Лагістык».