Трэнер ЦСКА: Я б рэкамендаваў Ганчарэнку ўсім, у тым ліку і «Спартаку»

Галоўны трэнер ЦСКА Леанід Слуцкі парэкамендаваў бы кіраўніцтву «Спартака» прызначыць Віктара Ганчарэнку галоўным трэнерам.

Пра гэта паведамляе sport-express.ru.

- Вы з Віктарам Міхайлавічам не абмяркоўвалі тэму ягонага магчымага прызначэння ў «Спартак»?

- Мы з ім абмяркоўваем разнастайныя тэмы.

- І што распавядае? Чырвона-белыя яго звалі?

- Ёсць гутаркі, якія не варта агучваць у інтэрв'ю. Вакол трэнераў заўсёды шмат чутак. Тым больш вакол Ганчарэнкі. Думаю, пра якую каманду ў Расеі цяпер гаворка ні зойдзе, ён абавязкова будзе фігураваць у спісах - доўгіх або кароткіх. Перамовы, закідванне вуд, апасродкаваная цікавасць... Але абмяркоўваць мае сэнс толькі канкрэтыку.

- Ёсць легенда, што год таму Федун кансультаваўся ў Жазэ Мурынью, і той рэкамендаваў яму Якіна. Калі б Леанід Арнольдавіч звярнуўся да вас, вы б рэкамендавалі Ганчарэнку?

- Я б рэкамендаваў Ганчарэнку ўсім, у тым ліку і «Спартаку». Справа не ў гэтым. Яшчэ раз паўтараю: кіраўнік павінен дакладна разумець, што яму трэба. Ёсць такая пацешная цытата з кінафільма «Не можа быць!»: «Яны самі не разумеюць, чаго яны хочуць». Вось чаго «хочуць» у «Спартаку»? Выхоўваць моладзь? Паказваць яркую гульню? Займаць нейкія месцы? Іх цікавіць стыль - ці толькі вынік? І гэтак далей, і таму падобнае. Гэтыя крытэрыі даюць зразумець, які трэнер ім падыходзіць. Адпаведна, адказ у «Спартаку» ведаюць толькі людзі, якія вызначаюць філасофію і палітыку клуба. Меркаванне астатніх, у тым ліку і маё, наўрад ці кагосьці хвалюе.