Намесніка дырэктара шклоўскага прадпрыемства падазраюць у карупцыі

Экс-намеснік дырэктара шклоўскага прадпрыемства падазраецца ў перавышэнні ўлады і прычыненні шкоды прадпрыемству больш чым на 280 тысяч еўраў.

Пракуратура Магілёўскай вобласці распачала справу за перавышэнне ўлады або службовых паўнамоцтваў, якое пацягнула цяжкія наступствы ў дачыненні да былога намесніка дырэктара аднаго з прадпрыемстваў Шклоўскага раёна.

Як паведаміў БелаПАН старшы пракурор аддзела барацьбы з карупцыяй і арганізаванай злачыннасцю пракуратуры вобласці Андрэй Бандажэцкі, падазраваны ў парушэнне службовых абавязкаў, а таксама патрабаванняў нарматыўна-прававых актаў, якія рэгламентуюць парадак рэалізацыі прадукцыі на экспарт, у 2013-2014 гадах арганізаваў адгрузку прадукцыі прадпрыемства без поўнай папярэдняй аплаты і пры наяўнасці дэбіторскай запазычанасці на адрас суб'екта гаспадарання Латвіі.

Замежная кампанія пасля поўны разлік не зрабіла. Пры гэтым у кіраўніка мелася рэальная магчымасць рэалізаваць прадукцыю іншым замежным арганізацыям на ўмовах поўнай папярэдняй аплаты.

Супрацьпраўныя дзеянні пацягнулі цяжкія наступствы ў выглядзе нанясення шкоды прадпрыемству ў асабліва вялікай суме больш чым на 280 тысяч еўраў.

Санкцыя ч.3 арт.426 КК прадугледжвае пакаранне за ўчыненне злачынства ў выглядзе пазбаўлення волі тэрмінам да 10 гадоў з канфіскацыяй маёмасці і з пазбаўленнем права займаць пэўныя пасады або займацца пэўнай дзейнасцю.