Справу аб катастрофе «Боінга» на Данбасе разгледзіць міжнародны трыбунал?
18- 24.06.2015, 8:16
- 11,524
Нідэрланды выступаюць за стварэнне міжнароднага трыбунала для судовага пераследу асоб, якія маюць дачыненне да катастрофы малазійскага «Боінга» на Данбасе.
Пра гэта паведамляе Reuters са спасылкай на свае крыніцы ў высокапастаўленых урадавых колах, паведамляе РБК-Украіна.
Са слоў крыніцы, у Нідэрландах усведамляюць, што шанцы на паспяховае расследаванне невялікія, але спадзяюцца на стварэнне інстанцыі накшталт Міжнароднага суда ААН, каб націснуць на Расею, чыя роля ў гэтым працэсе з'яўляецца вызначальнай.
Створаны трыбунал павінен будзе дзейнічаць пры падтрымцы Рады бяспекі ААН пасля таго, як будзе скончанае міжнароднае расследаванне прычын катастрофы самалёта і будуць названыя імёны падазраваных.
Нагадаем, 17 ліпеня 2014 года ў небе над Данецкай вобласцю збілі «Боінг» кампаніі Malaysia Airlines, які выконваў рэйс Амстэрдам - Куала-Лумпур. Усе 298 чалавек, якія знаходзіліся на борце, загінулі. Пераважная большасць з іх - 194 пасажыры - былі грамадзянамі Нідэрландаў.
Паводле звестак шэрагу міжнародных арганізацый, украінскіх уладаў і заходніх краін, самалёт збілі прарасейскія баевікі з дапамогай зенітнага ракетнага комплексу «Бук», перададзенага ім з РФ. Масква цягам усяго часу пасля тэракту зняпраўджвае сваё дачыненне да яго.
24 ліпеня Украіна дэлегавала расследаванне катастрофы самалёта Нідэрландам.