Чэкі «Жыллё» абрынуліся ў кошце

Менскі гарвыканкам прыняў пастанову аб чарговай індэксацыі імянных прыватызацыйных чэкаў «Жыллё», якія можна выкарыстоўваць пры будаўніцтве і куплі жылля.

Дакумент апублікаваны сёння на Нацыянальным прававым інтэрнэт-партале. У адпаведнасці з пастановай, індэкс росту кошту будаўніцтва жылля ў параўнанні з яго коштам на 31 снежня 1991 для індэксацыі чэкаў устаноўлены ў суме 122 219,7 рубля, піша onliner.by.

Папярэдняя пастанова аб чэках «Жыллё» была прынятая ў лютым 2015 года. Тады яны былі праіндэксаваныя з разліку 184 817,7 рубля за адзін чэк.

Імянныя прыватызацыйныя чэкі «Жыллё» могуць быць выкарыстаныя грамадзянамі і іх сямейнікамі, якія стаяць на ўліку для паляпшэння жыллёвых умоў, для выплаты першага ўзносу ў жыллёвым або жыллёва-будаўнічым кааператыве, для фінансавання індывідуальнага або калектыўнага жыллёвага будаўніцтва, рэканструкцыі дамоў, удзелу ў долевым будаўніцтве і куплі жылля. Акрамя таго, чэкамі можна сплаціць запазычанасць банкаўскіх крэдытаў і пазыкаў, узятымі на куплю або будаўніцтва жылля.

Індэкс росту кошту чэкаў «Жыллё» разлічваецца кожны квартал на падставе статыстыкі аб сярэднім кошту 1 квадратнага метра агульнай плошчай жылля, якое будуецца з дзяржпадтрымкай, у параўнанні з коштам яго будаўніцтва на 31 снежня 1991 года і сцвярджаецца аблвыканкамамі і Мінгарвыканкамам.