Запазычанасці прадпрыемстваў у заробках растуць рэкорднымі тэмпамі

Усё больш беларускіх прадпрыемстваў затрымліваюць выплату заробкаў работнікам.

Сума пратэрмінаванай запазычанасці ў звестках Нацыянальнага статыстычнага камітэта РБ на 1 ліпеня 2015 года склала 411,7 млрд рублёў. У параўнанні з пратэрмінаванай запазычанасцю на 1 чэрвеня 2015 года запазычанасць вырасла на 37%, або на 111,1 млрд рублёў, піша select.by.

Нягледзячы на вялікую суму запазычанасці, яна склала ўсяго 2,1% ад фонду заробкаў па краіне за травень 2015 года. Гэта значыць, у маштабах краіны затрымка заробку не з'яўляецца крытычнай. Праўда, Нацыянальны статыстычны камітэт улічвае не ўсю запазычанасць, а толькі ў камерцыйных арганізацыях, пад якімі разумеюцца юрыдычныя асобы, iх адасобленыя падраздзяленнi, якiя маюць асобны баланс, з сярэдняй колькасцю работнікаў за год 16 чалавек і больш, акрамя малых арганізацый без устаноўчай падпарадкаванасці.

Запазычанасць была зафіксавана ў 555 такіх арганізацыях. У асноўным гэта сельскагаспадарчыя прадпрыемствы, размешчаныя найчасцей у двух абласцях: у Віцебскай і Менскай.

У сферы сельскай гаспадаркі, палявання і рыбалоўства, пратэрмінаваную запазычанасць мелі 400 прадпрыемстваў. У той жа час, ў прамысловасці не разлічыліся з заробкам усяго 61 прадпрыемства.

Праўда, даволі вялікая колькасць прадпрыемстваў, якія затрымліваюць выплату заробкаў, у будаўніцтве: 81 прадпрыемства. Але для будаўнікоў затрымкі можна ўважаць справай звыклай.

У астатніх галінах эканомікі Беларусі затрымкі заробкаў з'яўляюцца адзінкавымі выпадкамі. Напрыклад, у сферы транспарту і сувязі іх усяго тры, а ў сферы гандлю, рамонту аўтамабіляў бытавых вырабаў і прадметаў асабістага карыстання - усяго два.

Менш за ўсё прадпрыемстваў, якія затрымліваюць заробак, у Берасцейскай вобласці - два. Трохі і ў Менску - 12. Сярод іх ААТ "Менскі завод аўтаматычных ліній ім. П. М. Машэрава", ТАА "Трыкатажная фабрыка арэол" і некалькі будаўнічых прадпрыемстваў, між іншым, ААТ "Моналітград" і будаўнічыя ўпраўленні №21 і №25 ААТ "Менскпрамбуд".