Апытанне: большасць грэкаў падтрымліваюць саступкі крэдыторам

Большасць жыхароў Грэцыі выступае за прыняцце умоў, пастаўленых краіне міжнароднымі крэдыторамі.

Пра гэта паведамляе Блумбэрг са спасылкай на звесткі праведзенага арганізацыяй GPO сацыялагічнага апытання, паведамляе ВВС.

На гэты момант за саступкі крэдыторам на нядзельным рэферэндуме гатовыя прагаласаваць 47% апытаных. У той жа час за адмову выконваць умовы ўльтыматума выказаліся 43% рэспандэнты. Астатнія пакуль не вызначыліся.

Апытанне праводзілася ў аўторак сярод тысячы рэспандэнтаў. Паводле звестак яго аўтараў, хібнасць не перавышае 3,1%. Пры гэтым яшчэ на мінулым тыдні колькасць прыхільнікаў адмовы ад саступак складала больш за палову.

У нядзелю ў Грэцыі пройдзе рэферэндум, на якім грамадзяне краіны павінны вызначыць, ці варта Афінам скарачаць дзяржаўныя выдаткі спосабам, прапанаваным крэдыторамі.

У выпадку адмовы грэкаў прымаць гэтыя ўмовы краіне пагражае дэфолт і выключэнне з еўразоны. Пры гэтым прэм'ер-міністр краіны Алексіс Цыпрас заклікаў насельніцтва галасаваць супраць саступак крэдыторам.

Цыпрас перакананы, што рашучая адмова ад пастаўленага яго краіне ультыматуму дасць яму магчымасць дамагчыся больш выгадных умоў, так як замежныя партнёры зацікаўлены ў захаванні зоны еўра ў яе цяперашнім выглядзе.

Скарачэнне выдаткаў Афінамі з'яўляецца абавязковай умовай разблакоўкі чарговай раты фінансавай дапамогі. Крэдыторы патрабуюць павысіць пенсійны ўзрост і скараціць сацыяльныя выплаты, у той час як улады Грэцыі прапануюць развязаць фінансавыя праблемы за кошт павышэння падаткаў для заможных грамадзян.